Сервис көкжиегі кеңеюде
«Қазақстан теміржолшысы» газетінің тілшісі
«Жолаушылар тасымалы» АҚ жолаушыларға қолайлы сервис көкжиегін кеңейтуде. Бұл жолы ұлттық оператор жолаушылар пойыздарына жол жүру құжаттарын сату жүйесін жетілдіріп, Kaspi Bank-пен бірге билетті сатып алу бойынша жаңа сервисті іске қосып отыр.
Бұдан былай сапарға шығуға қамданған жұртшылық билеттерді www.bilet.railways. kz сайтында ресімдеу кезінде, жол жүру құжатының ақысын ұялы телефонындағы Kaspi. kz мобильдік қосымшасы арқылы төлей алады.
Еліміздегі ең танымал сауда алаңдарының біріне айналған аталмыш қосымшаны пайдалану, жолаушылар үшін билеттерді тез әрі комиссиясыз онлайн сатып алуға мүмкіндік береді.
Сондай-ақ, Kaspi.kz қосымшасының қолданушылары билеттерді рәсімдеу кезінде Kaspi Бонус бағдарламасы бойынша бонустарға ие бола алады.
– Біз Қазақстанның ең танымал және сұранысқа ие банктік сервистерінің бірімен осындай ынтымақтастыққа қол жеткізіп отырғанымызға өте қуаныштымыз. Біз мұны «Жолаушылар тасымалы» АҚ-ның жолаушыларға ыңғайлылықты қамтамасыз ету, тұрғындарға билеттерді сатып алудың қосымша нұсқаларын ұсыну жолындағы маңызды қадамдарының бірі деп санаймыз. Билеттерді сатып алу процесін жеңілдете отырып, жақын болу, ыңғайлы болу – клиенттердің тәжірибесін жақсартуға қатысты компания басымдықтарының бірінен болмақ. Біздің жолаушыларымыз мұндай игі бастамаларды бағалайды деп үміттенеміз! – дейді Виктор Бошман «Жолаушылар тасымалы» АҚ Бас директорының Маркетинг және сату жөніндегі орынбасары.
Өз тарапынан Kaspi Bank мұндай сервистерді іске қосу халықтың өмірін жақсартып, «Жолаушылар тасымалы» АҚ-мен бірлесіп билет төлеу сервисін жақсарту және дамыту жұмыстарын жалғастыратынын атап өтті.
Еске сала кетсек, ұлттық тасымалдаушы жол жүру құжаттарының электрондық сату жүйесін жетілдіру және жемқорлықтың алдын алу мақсатында жаңа қызмет түрлерін енгізіп келеді. Соның бірі, өткен жылдың шілде айынан бастап енгізілген «Күту парағы» қызметі еді. Бүгінгі күнге дейін бұл қызметті 307 мыңнан астам адам пайдаланған. Ал, ағымдағы жылдың жазында WWW.BILET. RAILWAYS.KZ сайты арқылы әлеуметтік маңызы бар бағыттар бойынша мүгедек жандарға 50% дейін жеңілдікпен жол жүру құжаттарын (билеттерін) онлайн-режимінде рәсімдеу үшін «Мейірім» электронды дисконттық картасы сәтті енгізілді.
Аталмыш картаны бұған дейін 400-ге жуық адам қолданған. Карантиндік шараларды сақтау және коронавирус инфекциясының таралуын болдырмау мақсатында ұлттық тасымалдаушы өз жолаушыларынан жол жүру билеттерін WWW.BILET.RAILWAYS.KZ сайты арқылы онлайн-режимде ресімдеуді сұрайды.
Азаматтар өз өмірі мен денсаулығының қауіпсіздігін қамтамасыз ету үшін жаңа қызметтерді пайдалану қажеттігін ескертеді.