Теңіз порттар жұмысымен танысты

«Самұрық-Қазына» ҰӘҚ» АҚ Басқарма төрағасы Ахметжан Есімов бастаған делегация Атырау және Маңғыстау облыстарына жұмыс сапарымен барып, KPI кешенінің құрылыс алаңында, Ақтау және Құрық теңіз порттарында болды. Делегация құрамында «ҚТЖ» ҰК» АҚ Басқарма төрағасы Сауат Мыңбаев та болды. 

Ақтауда Қор басшысы Құрық және Ақтау порттарындағы ағымдағы жағдаймен танысты. Бұл инфрақұрылымдық нысандардың еліміздің транзиттік әлеуеті үшін маңызы зор. Оңтүстік-Шығыс Азиядағы пандемия жағдайы, сондай-ақ кейбір сыртқы факторлар олардың қызметіне әсер етті. Ахметжан Есімов «ҚТЖ» ҰК» АҚ мен Құрық портының басшылығына порттың жүктелу деңгейін арттыру үшін бірлескен күш-жігер жұмсауды тапсырды.

Еске сала кетсек, биылғы 7 айда еліміздің теңіз порттары арқылы 3,4 млн тонна жүк ауыстырып тиелді. Теңіз порттарында жүк таситын автокөлік құралдарын ауыс-тырып тиеу көлемі жүз пайызға өскен. Яғни, ол көрсеткіш өткен жылы көрсетілген уақыт кезеңінде 3 766 бірлік болса, биыл 7 540-ке жеткен. Сондайақ, контейнерлерді ауыстырып тиеу көрсеткіші 16% өсіп, 17 079 бірлікті құрады. Отандық сауда флотымен осы кезеңде Каспий теңізіндегі порттар арасында 1,32 млн тонна жүк тасымалданды. Оның ішінде 7 910 контейнер Ақтау – Баку фидер желісінің еншісінде. Ал биылғы бірінші жартыжылдықтың қорытындысы бойынша ішкі су жолдары бойынша тасымалдау көлемі 845,1 мың тоннаны құрап, 2019 жылғы көрсеткіштен 65,8% өсті. Оның ішінде 138 мың тонна Ресей бағытында болды.