Локомотивтер сынақтан өтуде
«Қазақстан теміржолшысы» газетінің тілшісі
«ҚТЖ-Жүк тасымалы» ЖШС филиалдары қатарындағы локомотив пайдалану деполарында локомотивтер қазір кезекті күзгі комиссиялық байқаудан өтуде.
Күзгі комиссиялық тексерістің міндеті әдеттегідей тартымдық жылжымалы құрамның техникалық жағдайын және қыс маусымында жұмыс істеуге дайындығын тексеру болмақ. Ағымдағы жылы байқаудан 1300-ден астам локомотив өтеді деп күтілуде. Емтихан іспеттес маңызды шараны өткізу үшін әрбір локомотив пайдалану депосында депо директорының жетекшілігімен комиссиялар құрылған. Ал комиссия құрамына келсек, оның қатарында пайдалану депосының, жөндеу кәсіпорындарының, химико-техникалық лаборатория өкілдері, локомотивтерді тәжірибелі қабылдаушылар, инженер-технологтар, машинист-нұсқаушылар, өрт қызметінің инспекторлары бар. Күзгі комиссиялық байқаудың орындалуы «ҚТЖ-Жүк тасымалы» ЖШСнің орталық аппараты тарапынан бақылауға алынған.
«Күзгі комиссиялық байқау барысында әрбір локомотивтің техникалық, өртке қарсы және мәдени жағдайы тексерілетін болады. Сонымен қатар суық мезгілде машинист пен оның көмекшісіне алаңдамай жұмыс істеуі үшін кабинада қолайлы жағдайдың жасалуы да назардан тыс қалмақ емес. Әсіресе, пойыздардың қозғалыс қауіпсіздігін қамтамасыз ететін аспаптардың істен шықпай, қалтқысыз қызмет етуі ерекше назарға алынбақ. Осылайша, локомотив паркінің жағдайы бес балдық жүйе бойынша бағаланатын болады», – дейді мамандар.
Үстіміздегі жылдың 30 қазанына дейін жалғасатын күзгі байқау барысында локомотив бригадалары техникалық сабақтарда ережелер мен нұсқамаларды қайталап, төменгі температурада, қатты боран тұрып, тоқтаусыз қар жауған шақта үздіксіз жұмысты қамтамасыз ету үшін қалай амал-әрекет етуді үйренетін болады.