«Карантин бұрышы» жасақталған
«Қазақстан теміржолшысы» газетінің тілшісі
Елімізде жолаушылар тасымалына «жан біткелі» тоғыз жолдың торабы «Нұрлы жол» вокзалында да қызу тірлік қалпына келді. Бірақ, қаупі сейілмей отырған пандемияға байланысты сақтық шаралары әлі де қатаң сақталып отыр.
Бас санитар дәрігердің бұйрығына сәйкес кешенді нұсқаулықтар, жеке бас қорғаныш құралдарын уақытында ауыстырып отыру, зарарсыздандыру және жуу құралдары мен антисептиктердің қажетті қорымен жасақтап, оны қадағалап отыру, нұсқаулықты мерзімді жүргізу бойынша журналдарды толтыру жұмыстарына жауапты мамандар бекітілген.
Вокзалда барлық жердегідей маска тағу режимі сақталады. Кешенге кіреберістерге сағат сайын залалсыздандырғыш құралдар себілетін 11 кілемше бар. Сондайақ кірерде қауіпсіздік қызметі жолаушылардың қызуын контактісіз термометрмен тексереді.
Күн сайын кешен қызметкерлеріне термометрия жүргізіледі. Кіреберістерде және адам көп жиналатын жерлерде қолды зарарсыздандыруға арналған 41 санитайзер қойылған.
Қызметкерлер және жолаушылар арасында 2 метрден кем емес арақашықтықтың сақталуы бақылауға алынып, едендерге әлеуметтік қашықтық пен адамдар ағынын бағыттауға арналған жапсырмалар желімделген.
Залдарда ауаны зарарсыздандыру үшін үш рециркулятор қойылған. Ең бастысы, COVID-19 белгілері бар жолаушылар немесе қызметкерлерге жедел жәрдемге дейін оқшаулау үшін «Карантин бұрышы» жасақталған. Вокзал кешені аумағында жеке қорғаныш құралдарын жоятын арнайы урналар қойылған. Әр 30 минут сайын жолаушылар санитарлық сақтық шараларын сақтау керектігі жөнінде дауысзорайтқыш байланыс немесе бейнероликтер арқылы ақпараттандырылып отырады.
Биылғы 2 қарашадағы деректер бойынша кешенде 50 мыңнан астам медициналық масканың, 22 мыңнан астам медициналық қолғаптың, 3451 литр антисептик, 2072 банка зарарсыздандырғыш құралдың, 720 дана обаға қарсы костюмнің қоры бар.
«Нұрлы жол» вокзал кешенінде 2020 жылға жолаушылар пойызы қозғалысының бекітілген кестесіне сәйкес 19 жұп жолаушылар пойызы жүреді. Карантин шараларына байланысты 2 қарашадағы жағдай бойынша қазір кешен арқылы 14 жұп пойыз қатынап тұр.
Биылғы жылдың 10 айы ішінде 1 635 млн жолаушыға қызмет көрсетілген. Бұл орташа тәулікке шаққанда 5 378 мың адамнан келеді.