Шымкентте жыл басынан бері пойыздар 5 адамдарды қағып кетті

Шымкент магистральдық желі бөлімшесі бойынша пойыздар қозғалысы қауіпсіздігінің қамтамасыз етілуі қанағаттанарлық деуге болады. Жыл басынан бері 10 айда 7 бұзушылыққа жол беріліпті. Бұл өткен жылмен салыстырғанда үшеуге кем, яғни былтыр қозғалыс қауіпсіздігі бойынша 10 бұзушылыққа жол берілген.

Әрине, пойыздар қозғалысында ешқандай апатты оқиғаларға жол берілмеген. Дегенмен тіркеліп отырған жеті жағдай да мәз емес, Оның біреуі – сигналдың өтпе жолымен жабылуы, 5 – адамдарды қағып кету, 1 – пойызды 1 сағаттан артық кідірту фактісі тіркелді. 

Бұдан бөлек, НЖС-9 бойынша құрылғылар жұмысының іркілісіне 53 рет, жол шаруашылығы бойынша құрылғылардың істен шығуына 24 рет жол берілген. 

Әрине, шұғыл тежеудің, бөгде адамдар мен қараусыз жайылған төрт түлік малдың, дистанция жолдарында теміржолдың үстіңгі қабат материалдары мен басқа да мүліктердің ұрлануының алдын алу мақсатында теміржолшылар биыл да бірқатар жұмыстар жүргізді. Атап айтқанда, жақын маңдағы елді мекендердің тұрғындарына теміржолдағы қауіпсіздік пен жуапкершілік жайлы ескертетін ҚР Кодексінің 559-бабының 1-55-тармағынан 1752 үзінді көшірмелер таратты. Станцияларда 2609 адамды қамтыған 39 жиналыс өткізілді. 

Өз кезегінде «Теміржол – қауіпті аймақ» тақырыбында 3778 оқушыға да түсіндіру жұмыстары жүргізілді.

3310 мал иесіне теміржолда мал жаю және айдап өту ережелері таныстырылып, төрт түлікті қараусыз қалдырудың соңы зор шығынға ұшырататыны тағы қатаң ескертілді.

Сонымен қатар, НЖС-9 теміржолшылары қауіпсіздікпен қатар ұрлыққарлыққа қарсы 19 рейд жүргізді. 

Желілік полициямен бірлесіп өткелдерде 12 кешенді рейд тағы өткізіп, 705 жүргізушіге жолдағы қауіпсіздік ережесі таныстырылды, 6 кәсіпорында 49 адамға түсіндіру жұмыстары жүргізілді. 

Биылғы жылы 23 км дейін жолға малдан қоршау тұрғызу  жоспарланған болатын. ПЧ-53 дистанциясы 20 км жолды, ал ПЧ-54 3 км жолды қоршап, әу бастағы 23 км межені толығымен орындап шықты. 

Бір әттеген-айы, теміржолшылардың бұл еңбегі жемісін беріп отыр деп айта алмаймыз. Себебі, тұрғындар темір жолдың мүлкіне көз тігуін қояр емес, мал қараусыз жайылады, адамдар белгіленбеген жерлерден өтеді. Салдарынан адамдардың жолға шығуы мен қоршау ұрлаудың тағы 5 жағдайы тіркеліп отыр. 

Осы орайда, НЖС-9 бойынша тұрақты жұмыс істейтін жұмыс тобы құрылды. Олар жолдан өту ережесін бұзған адамдарға, қараусыз қалған малға қатысты арнайы іс-шаралар әзірлеп, іске кірісті. Нәтижесін алдағы уақытта хабарлайтын боламыз.