210 түрлі ақау мен сәйкессіздік анықталған
Жамбыл облысы аумағында автомобиль жолдарымен қиылысатын 84 теміржол өткелі бар. Оның ішінде 57 реттелетін және 27 реттелмейтін өткелге жатады.
Жуырда тәртіп сақшыларының теміржол өткелдерін тексеру барысында олардың жай-күйінен 210 түрлі ақау мен сәйкессіздік анықталған. Бұл кемшіліктерді жою үшін теміржол өткелдеріне қызмет көрсететін ұйымдар басшыларына 76 нұсқаулық жолданған.
Теміржол өткелі – қауіпті жер, сондықтан ол барлық талапқа сай болып, арнайы жол белгілерімен жабдықталуы керек. Теміржолды кесіп өту тек белгіленген жерлерде ғана қолжетімді. Өкінішке орай, көптеген автокөлік жүргізушілері бос жолды көріп, теміржол өткелінен өту ережелерін қасақана бұзып жатады. Бұл ережені елемегендерге 27 780 теңге, яғни 10 айлық есептік көрсеткіш көлемінде айыппұл салынады. Жыл басынан бері облыста 119 адам теміржол өткелдерінен өту ережелерін бұзғаны үшін әкімшілік жауапкершілікке тартылды.
Темір жолдарды кесіп өту ережелерін сақтамағаны үшін айыппұл санкцияларын қолдану жолдардағы қауіпсіздікті қамтамасыз етуге және адамдардың өмірі мен денсаулығын сақтауға бағытталған.