ҚТЖ 100 жас есім: табыс тетігі

Екінші жыл қатарынан жүзеге асып жатқан «ҚТЖ 100 жас есім» жобасы шеңберінде болашақ жас мамандарды іріктеу барлық құрылымдық бөлімшелерде жүргізілді. Бүгінгі таңда жас теміржолшылар кәсіби білімдері, дағдылары, іскерлік және жеке қасиеттерін бағалау нәтижелері бойынша іріктеліп, кейіннен басшылық лауазымдарға ұсыну үшін компанияның кадрлық резервіне енгізілген. Жобаға қатысушылар қатарында Жомарт Мырзабеков пен Ержан Келдібаев бар. 30 жастағы Жомарт Мырзабеков осы жылдың сәуір айында Павлодар магистральдық желі бөлімшесіне қарасты Екібастұз жол дистанциясының бастығы болып тағайындалды. Ол М.Тынышпаев атындағы Қазақ көлік және коммуникация академиясын және Қазақ қатынас жолдары университетін бітірген. Еңбек жолын Астана жол дистанциясында жол монтері болып бастаған. Ал Ержан Келдібаев осы жылдың мамыр айында Павлодар локомотив пайдалану депосы бастығының орынбасары қызметіне жоғарылады. Оған дейін жас маман Екібастұз локомотив пайдалану депосының өндірістік қауіпсіздік және экология секторының бастығы болды. Ол академик Қ.Сәтпаев атындағы Екібастұз инженерлік-техникалық институтын және Омбы мемлекеттік қатынас жолдары университетін бітірген. Темір жолдағы алғашқы тәжірибесін «Локомотив 2030» ЖШС – «Екібастұз локомотив депосында» электровоздарды жөндеу жөніндегі инженер-технолог болып бастаған. Қазіргі таңда «ҚТЖ 100 жас есім» жобасының қатысушылары оқудың екінші жылын өтіп жатыр, онда олар ішкі жаттықтырушылардың құзыреттіліктерін дамытып, ағылшын тілін үйренуде. Жоба компанияның екі басты корпоративтік құндылығы – көшбасшылық және өршілдік шеңберінде іске асырылуда.