Қоршаған ортаны қорғау мәселелерін талқылады
«Қазақстан теміржолшысы» газетінің тілшісі
Ағымдағы жылдың 17 маусымында Қоршаған ортаны қорғау саласындағы ынтымақтастық мәселелерін қарау бойынша Достастыққа қатысушы мемлекеттердің теміржол әкімшіліктерінің уәкілетті өкілдерінің IX Кеңесі бейнеконференция режимінде өтті. Конференцияға Ресей, Қазақстан, Украина, Беларусь, Қырғызстан, Грузия, Әзербайжан республикаларымен бірге Оңтүстік Кавказ теміржол әкімшіліктерінің өкілдері қатысты. Жиынға қатысушылар 8 кеңестің шешімдерінің орындалуы, теміржол көлігі саласындағы экологиялық қауіпсіздік жөніндегі Халықаралық орталықтың 2021-2023 жылдарға арналған іс-шаралар жоспарын әзірлеу және экологиялық қауіпсіздік жөніндегі халықаралық орталықтың жұмыс тобы туралы ережені бекіту мәселелерін талқылады. «ҚТЖ» ҰК» АҚ атынан сөз алған Өндірістік қауіпсіздік және экология департаментінің бас менеджері Сағат Қабиев өндірістік қауіпсіздік процестерін жақсарту бағытындағы цифрлық шешімдер ретінде KTZHSE Өндірістік қауіпсіздік біріктірілген жүйесі жобасын көпшілік назарына ұсынды. «Өндірістік қауіпсіздік» біріктірілген жүйесіне енгізілген «Экологиялық қауіпсіздік» модулі 2020 жылдың 1 шілдесінен бастап тәжірибелік пайдалануға берілді. Бұл модульдің үлкен функционалы бар және ол экологиялық қызметті цифрландырудың негізгі құралы болып табылады. Компанияның филиалдары мен еншілес ұйымдарының экологтары модульде белсенді жұмыс жүргізуде. Осы модульді қоршаған ортаны қорғау бойынша жауапты тұлғалардың жұмысына енгізе отырып, біз эмиссияларды есептеуді толығымен автоматтандырдық, айыппұл санкцияларын салу тәуекелдерін бақылап, ҚР заңнамасының талаптарын сақтап, қағаз жүзінде іс жүргізуді қысқартып, кадрлардың тұрақтамауына байланысты жұмысқа тиетін кері әсерлерді азайтып отырмыз. Сондай-ақ, адами факторларды жойып, уақытты үнемдеу мүмкіндігі туып отыр», – деді модульдің ерекшеліктеріне тоқталған Сағат Қабиев. Жиын соңында Достастыққа қатысушы мемлекеттердің теміржол әкімшіліктері уәкілетті өкілдерінің қоршаған ортаны қорғау саласындағы ынтымақтастықты дамыту мәселелерін қарау жөніндегі кезекті кеңесі 2021 жылдың қазан айында өткізілетін болып келісілді.