Вагоншылар жұмысы жеңілдейді

«ҚТЖ-Жүк тасымалы» ЖШС-на қарасты Алматы және Атырау вагон деполарында «Вагон пайдалану депосын автоматтандыру» жобасы пилоттық режимде іске қосылмақ. Егер тәжірибеден сәтті өтсе, жаңа жоба еліміздің өзге вагон кәсіпорындарына таратылады деп жоспарланып отыр. Вагон қараушылардың жұмысын автоматтандырумен қатар бизнес-процестердің ашықтығын арттырып, вагондарға техникалық қызмет көрсету уақытын қысқартатын және өндірістік қауіпсіздікті бұзушылықтар санын азайта түсетін жобаны дайындаумен мамандар төрт ай айналысыпты. Бұл туралы «ҚТЖ-Жүк тасымалы» ЖШС Бас директорының орынбасары Қанат Көбесов «Инновациялық логистика жүк иелеріне көліктік қызмет көрсету сапасын жақсарту құралы ретінде» атты дөңгелек үстел барысында мәлімдеді. Қазіргі уақытта вагон пайдалану деполарындағы тапсырмалардың көпшілігі қолмен атқарылып келеді. Вагон қараушылар хабарлама дәптерін жүргізіп, онда олар вагондардың жай-күйі туралы деректерді жазады. Анықталған ақаулар мен вагонды жөндеуге ағытып алу қажеттілігі туралы хабарды вагон қараушы Техникалық қызмет көрсету пунктінің вагон операторына парктік радиобайланыс арқылы жеткізіп, содан кейін қажетті формаларды ресімдеу үшін кеңсеге келеді екен. Ал жоба жүзеге асқаннан кейін вагон қараушылар қағазбастылықтан біржолата босатылмақ. Яғни, мобильді қосымшаны енгізу уақытты үнемдеп, деректерді беру кезінде қателерге жол бермейді. Электронды құжат нақты уақыт режимінде вагонды қарау кезінде ресімделетін болады. Қанат Көбесовтің айтуынша, вагон қараушылар мобильді қосымшада жылжымалы құрамды тексеру барысында анықталған ақауларды тіркеп, вагон операторының порталына деректерді жіберіп, кері байланыс орната алады. Құрамды қарау қорытындыларын келісу осы порталда жүзеге асырылмақ. Вагон шаруашылығы жұмысына жаңа технологияны енгізу персоналдың технологиялық тәртіп деңгейін арттырып қана қоймай, жылжымалы құрамға қызмет көрсету сапасын жақсарта түспек. Порталда ауысым мен тәулік үшін вагон депосының қызметі бойынша өспелі есептілік қалыптастырылмақ. Тәжірибені басқа вагон қызметтеріне таратқаннан кейін талдау жүргізу үшін орталықтандырылған деректер базасы бүкіл ел бойынша вагон шаруашылығында, сондай-ақ, бір депода құрылатын болады.