Өзбектер Ақтау порты арқылы тамсымалданатын жүктерінің еселенуіне мүдделі
«Қазақстан теміржолшысы» газетінің тілшісі
Ақтау портына Өзбекстан Республикасының Көлік министрі Илхом Махкамов пен «Узбекистон темір йуллари» (УТЙ) АҚ басшысы Хуснутдин Хасилов бастаған делегация келді. Мәртебелі меймандарды «Ақтау теңіз сауда портының» ҰК» АҚ басқарма төрағасы Абай Түрікпенбаев Ақтау портының инфрақұрылымдық мүмкіндіктерімен таныстырды. Биылғы жылдың сәуір айында Ташкент қаласында «АТСП» ҰК» АҚ мен «УТЙ» АҚ арасында екіжақты ынтымақтастықтың негізгі қағидаттары мен мақсаттарын айқындайтын өзара түсіністік туралы меморандумға қол қойылғаны белгілі. Өзбекстан делегациясының осы жолғы жауап сапары тараптардың халықаралық мультимодальдық тасымалдарды ұлғайту жөніндегі ниеттерін іске асыру жолындағы практикалық қадам болып отыр. Мәжбүрлі шектеулерге қарамастан, Ақтау порты арқылы өзбекстандық контейнерлік жүктерді тасымалдау көрсеткіштері өсуде. Мәселен, 2019 жылы 210 ЖФЭ контейнер болса, 2020 жылы бұл көрсеткіш 1 477 ЖФЭ-ні құрады. Өзбекстандық жүк жөнелтушілердің өткізу нарықтарына жүктерді жеткізу бойынша әлеуетті қызығушылығы – бұл Ақтау порты арқылы қолданыстағы бағдарларды толтыруға және перспективалық бағыттарды дамытуға нақты алғышарттар болмақ. Еске сала кетсек, «ҚТЖ» ҰК» АҚ басқарма төрағасы Нұрлан Сауранбаев Өзбекстанның Көлік министрі Илхом Махкамовпен және «Узбекистон темир йуллари» АҚ басшысы Хуснутдин Хасиловпен теміржол көлігі саласындағы ынтымақтастық мәселелері бойынша келіссөздер жүргізгені жайлы хабарлаған болатынбыз. Тараптар теміржол көлігін дамыту бойынша екі ел үкіметтерінің бірлескен бастамаларын орындауды басшылыққа ала отырып, тасымалдау көлемін одан әрі арттыру мәселелерін талқылады. Ағымдағы жылдың алты айында екі ел арасында 12 млн тоннадан астам жүк тасымалданған.