Жыл басынан бері «Қорғас» порты арқылы Қытайға шамамен 90 мың контейнер жүк жөнелтілген

Еліміздің оңтүстік-шығысында қазақ-қытай шекарасында орналасқан «KTZE-Khorgos Gateway» құрғақ порты арқылы пандемия кезінде де жүк көлемі артып отыр, деп хабарлайды Rail-news.kz. Былтыр порт арқылы тасымал көлемі 200 мың ДФЭ болса, биыл алғашқы жартыжылдықтың өзінде 102 мың ДФЭ жүк тасымалданған. Бұл шамамен 80-90 мың контейнерді құрайды. Қазақстанның маңызды көліктік-логистикалық орталығы болып саналатын портта тәулігіне 10-12 құрам өңделеді, бұл дегеніңіз 500 контейнер. Порттағы 6 теміржол бойында үш контейнерлік кран, яғни RMG 1, 2 және 3 жұмыс істейді. Олардың әрқайсысы салмағы 41 тоннаға дейін жететін жүкті көтере алады. Құрамы 45-50 вагоннан тұратын бір контейнерлік пойызды қайта тиеуге кететін уақыт орташа есеппен 55 минутты құрайды. Порт аумағында сонымен қатар бір мезгілде 18 мыңнан астам контейнер сақтауға арналған мамандандырылған контейнерлік алаң, жалпы ауданы 10 мың шаршы метрлік уақытша сақтайтын екі қойма және жөндеу мен арнайы техникаға қызмет көрсету бойынша жеке шеберхана да бар. «KTZE-Khorgos Gateway» портында бүгінде 180 адам еңбек етеді, оның 90 пайызы – жергілікті тұрғындар. Порт тәулік бойына жұмыс істейді және мұнда тәулігіне 24 пойызды қабылдап, жөнелтуге мүмкіндік бар. Қазақстан арқылы Қытайдан Еуропаға, Ресейге және Орталық Азияға бағытталған маршруттар ең сұранысқа ие бағдарлар болып саналады.