Қысқа дайындық жоспарындағы 187 іс-шараның әзірге 18-і ғана орындалған

Үстіміздегі жылдың 7 қыркүйегінде 2021-2022 жылдардың қыс маусымына «ҚТЖ» ҰК» АҚ және еншілес ұйымдар мен филиалдардың кадрлары мен шаруашылықтарының дайындығы туралы селекторлық кеңес өтті. Ұлттық компанияның басқарма төрағасы Нұрлан Сауранбаевтың төрағалығымен өткен жиында Магистральдық желі дирекциясының, «ҚТЖ-Жүк тасымалы» мен «Теміржолсу» кәсіпорындары басшыларының есептері тыңдалды, деп хабарлайды Rail-news.kz. Компанияда қыс маусымындағы жұмысқа дайындықты ұйымдастыру үшін құрылған арнайы штаб бар. Мұндай штабтар аймақтарда жол бөлімшелерінде, құрылымдық және еншілес ұйымдарда да құрылған. Ал әзірлік бойынша шаралар биылғы маусым айында штаб тарапынан бекітіліп, есеп беру кестесі жасалған. Негізгі шаралар – жылжымалы құрамдарды, қар жинайтын техникаларды, өндірістік-техникалық ғимараттар мен қазандықтарды дайындаумен қатар «алғашқы қыстаушыларды» қатал маусымда жұмыс істеу тәсілдеріне оқытып, үйретіп және кадрларды жылы қысқы киімдермен және көмірмен қамтамасыз ету, т.т. алдағы қараша айының 1-не дейін толық аяқталуы керек. Жалпы, жоспарға сәйкес биыл 187 шараны орындау межеленген. Ал 6 қыркүйектегі жағдай бойынша небәрі 18 шара орындалыпты. Әлі 169 шараны орындау міндеті тұр. Мәселен, Магистральдық желі дирекциясы бойынша 82 іс-шара қарастырылса, соның үшеуі ғана толық көлемде орындалған. Қыс маусымында бірінші рет жұмысқа түскелі отырған 1377 маман оқытылған. Ал қалған «алғашқы қыстаушылар» тәжірибелі мамандарға бекітіліп, оқытылу үстінде. Сонымен қатар 1728 ғимаратқа ағымдық жөндеу жүргізіліп, жоспар 67% орындалған. 39 км жол бойындағы қардан қорғау шарбақтарына ағымдық жөндеу жасалып, бұл шаруа 63% орындалған. Қар тазалау техникаларының 40 бірлігі немесе 82% деполық жөндеуден және қызмет мерзімін ұзарта отырып, жөндеудің деполық түрінен өткен. Сондай-ақ, қысқы арнайы киім мен аяқ киімнің жоспарланған тапсырысы 66% орындалған. Ал «ҚТЖ-Жүк тасымалы» ЖШС бойынша шаруашылықтарды қысқа дайындау жоспарында 18 іс-шараны орындау қарастырылса, соның бүгінде 80% орындалған. Ерекше назар локомотив шаруашылығына аударылған. Оның ішінде, электрлі жылжымалы құрамда түйіспелі сымның мұздануына қарсы күресу үшін жабдықты дайындау жоспары 37% орындалса, тораптар мен жүйелерді қысқы режимге ауыстыра отырып, локомотивтерді дайындау жұмысын күзгі тексеру кезінде атқару жоспарланған. Қысқы аяқ киім және арнайы киіммен қамтамасыз ету 78% орындалған. Қыста жұмыс істеудің әдіс-тәсілін 748 «алғашқы қыстаушы» меңгеріп, тәжірибелі мамандарға бекітілген. «Теміржолсу» АҚ бойынша су және жылумен жабдықтау нысандарын дайындауға қатысты 14 іс-шара жоспарланса, бүгінде оның 70% орындалыпты. Кәсіпорын басшылығы қалған шаруаны 1 қазанға дейін бітіруге мүдделі екендерін жеткізді. 2021-2022 жылдардағы жылыту маусымына көмірдің жалпы талап етілетін көлемі 108 326 тоннаны құрайды, оның ішінде «Теміржолсу» АҚ еншілес ұйымдарының қазандық шаруашылығының өз мұқтажына қажет көмір көлемі – 23 299 тонна. Бүгінде барлық серіктестіктер бойынша шарттар жасалған, қоймалардағы қолда бар көмір қоры 2 039 тоннаны құрап отыр. Сонымен қатар жоспарлы түрде 3982 өндірістік-техникалық ғимарат пен 458 қазандықты дайындау жұмыстары жүргізілуде екен. Компания басшылығы шаруашылықтарды қысқы кезеңде дайындау сапасын бақылау мақсатында күзгі тексеру аяқталғаннан кейін жаппай тексеру ұйымдастырылатынын атап өтті. Тексеру қазан айының екінші жартысына жоспарланған. Ал 1 қарашада штаб іс-шараларды 100% орындағандарға 2021-2022 жылдардың қысқы кезеңінде жұмыс істеуге дайындығы туралы куәлік беретін болады.