Арнайы комиссия локомотивтердің қысқа дайындығын тексеруге кірісті

Еліміздегі локомотив пайдалану деполарында жыл сайынғы дәстүрлі күзгі комиссиялық байқау басталды. Тартымдық жылжымалы құрамдардың алдағы қатал маусымда, қалың қар, үскірік аяз бен боранды ауа-райында жұмыс істеуге дайындығын тексеру – қысқа қамданыс қамы. – Ағымдағы жылдың 10 қыркүйегі мен 31 қазан аралығында локомотивтерге күзгі комиссиялық байқау жүргізу және оларды қыста пайдалану режиміне ауыстыру бойынша жұмыстарды уақытылы орындау мақсатында үстіміздегі жылдың 1 қыркүйегінде ГПИТ/9650 факсограммасы барлық локомотив пайдалану деполарына жіберілді. Тексеру кезінде әр локомотивтің техникалық, эстетикалық және өртке қарсы жағдайы бағаланатын болады. Тартымдық қызмет көрсететін жылжымалы құрамдардың жүйелері сенімді де мүлтіксіз жұмыс істеп тұру керек. Сондықтан толықтай тексеру, жазғы жанар-жағармайлар мен отынның қысқы түріне ауыстырылғанына талдау жүргізілетін болады, – дейді «ҚТЖ-Жүк тасымалы» ЖШС Локомотив шаруашылығы департаментінің менеджері Түктібай Ақынбеков. Айтуынша, биыл күзгі комиссиялық байқаудан 1485,5 бірлік локомотив өтеді екен, соның ішінде 2ТЭ10 сериялы – 42 тепловоз, ТЭМ – 216, ЧМЭ – 51 бірлік, 2ТЭ10МК/ВК – 162 бірлік, ТЭ33А/Ас – 332 бірлік, ТЭП33 – 32, СКД6/ТЭМ KZ – 115 бірлік. Ал электровоздарға келсек, ВЛ80 – 391,5 бірлік, ВЛ40 – 14 бірлік, ВЛ60 рельсмайлағыш – 2 бірлік, KZ4Ас – 25 бірлік, KZ4Ат – 25, KZ8А –70 бірлік. Күзгі комиссиялық байқау кезінде қыс маусымында пойыздардың қозғалыс қауіпсіздігін қамтамасыз ете отырып, жұмысты ұтымды ұйымдастыра білетін локомотив бригадаларының білімдерін арттыруға айрықша назар бөлініп отыр. «Алғашқы қыстаушылар» қатал маусымда жұмыс істеу қыр-сырына үйретіліп, тәжірибелі мамандарға бекітілген. Қолдағы деректерге сүйенсек, биыл бірінші қысқа 186 машинист және 275 көмекші, яғни барлығы 461 адам шыққалы отырған көрінеді. Яғни, машинист «алғашқықыстаушы» болса, оның жанындағы машинист көмекшісі көп жыл тәжірибесі бар маман. Ал биыл бірінші рет қатал маусымда жұмыс істеп, біліктілігін шыңдағалы отырған машинист көмекшісі автоматты түрде тәжірибелі локомотив жүргізушісінің жанына бекітіледі. Орталық аппаратта күзгі комиссиялық байқаудың өткізілу барысын бақылауға алып, кейінірек аймақтарға тексеруге шығатын комиссия құрылған. Ел өңірлерінде ККБ комиссиясына жүк тасымалы бөлімшелерінің басшылары жетекшілік етеді. Комиссия құрамына ҚТЖ-Жүк тасымалы, Магистральдық желі бөлімшелері, ревизорлар, тағысын тағы құзырлы мамандар кіріп отыр. Күзгі комиссиялық байқау алдағы қазан айының 30-да мәресіне жетпек. Байқау нәтижесі бойынша локомотивтердің жағдайы мен олардың қыс маусымында тұрақты жұмыс істеуге дайындығын растайтын куәлік беріледі.