Қазақстан машина жасаушыларының IX форумы өтеді
«Қазақстан теміржолшысы» газетінің тілшісі
Биыл 22-24 қыркүйек аралығында ЕХРО Халықаралық көрме орталығы алаңында ҚР Үкіметінің қолдауымен Қазақстан машина жасаушыларының IX форумы өтеді, деп хабарлайды Rail-news.kz. Дәстүрлі форум шеңберінде машина жасау және металл өңдеу бойынша «Kazakhstan Machinery Fair 2021» I халықаралық мамандандырылған көрмесі де ұйымдастырылады. Сондай-ақ, шара аясында Үкімет мүшелерінің қатысуымен кеңейтілген отырыс, 2019-2024 жылдарға арналған машина құрастыруды дамытудың Жол картасын жүзеге асыру туралы пікірсайыс өткізілмек. Сонымен қатар машина жасау саласына кадрлар дайындау ісі қаралып, машина жасау саласының басым бағыттары бойынша секциялық жиындар өткізу де жоспарланған. Маңызды іс-шараның екінші күніндегі секциялық отырыстардың бірі «Темір жол саласындағы машина жасау» ісіне арналады. Бұл тақырып аясында теміржолда машина жасау ісінің инновациялық және индустриалды дамуы туралы сөз болады. Айта кетейік, отандық машинажасау өндірісінің көш басында теміржол машиналарын жасау саласы тұр. Тек тәуелсіздік жылдары Астанадағы индустриялық паркте Локомотив құрастыру зауыты, Электровоз құрастыру зауыты, «Тұлпар-Тальго» жолаушы вагондарын жасау және Екібастұз жүк вагондарын шығару кәсіпорындары мен Ақтөбеде рельс өндірісін жолға қойған алып өндіріс орындары іске қосылды.