Жыл басынан бері 28 адамның ажалы теміржолдан болған
«Қазақстан теміржолшысы» газетінің тілшісі
Теміржол көлігінің қауіп-қатерін елемей, абайсызда ажал құшып жатқандар саны артпаса, кемімей отыр. ҚР Индустрия және инфрақұрылымдық даму министрлігі баспасөз қызметінің мәліметі бойынша, биыл сегіз ай ішінде 53 адамды пойыз қағып, 28 адам мерт болған. Оқиғаларды талдау мен тексеру қайғылы жағдайларға көбіне зардап шеккендердің өздері кінәлі екенін айғақтайды. Олардың бірі құлаққаппен музыка тыңдап келе жатып пойыздың келгенін байқамай қалса, енді бірі масаң күйде жолға шығып кетіп опық жейді, ал кейбірі өмірден түңіліп, өз-өзіне қол жұмсамақ болады. Тақап қалған пойыздың алдынан өтіп үлгеремін дейтіндер де бар. Күз басталысымен «Қазақстан темір жолы» ҰК» АҚ осындай оқиғалардың алдын алу іс-шараларын күшейтті. Теміржол станцияларында, халық жолды рұқсатсыз кесіп өтетін жерлерде көлік полициясы желілік бөлімшесі қызметкерлерінің қатысуымен рейдтер өткізілуде. Теміржолға жақын орналасқан аудан тұрғындарына қауіпсіздік ережелерін сақтау қажеттілігі туралы түсіндіру жұмыстары жүргізілуде.