Алматыда көлік және логистика көрмесі мен халықаралық конференция өтеді
«Қазақстан теміржолшысы» газетінің тілшісі
Биыл 13-15 қазан аралығында Алматыда «Көлік және логистика» – TransLogistica Kazakhstan 2021 халықаралық көрмесі өтеді. Екі күн ішінде қатысушылар отандық көлік саласының жай-күйі мен даму перспективаларын талқылайды, деп хабарлайды Rail-news.kz. Атап айтқанда, онда контейнерлеу бағдарламасы, көлік саласындағы ақпараттық және цифрлық технологиялар, КТО құрылысын және көлік пен логистикадағы инфрақұрылымдық мәселелер сөз болады деп күтілуде. Көрмеге қатысушылар қатарында Қазақстан мен шет елдердің теңіз порттарының, темір жолдары мен арнайы экономикалық аймақтарының әкімшіліктері, көлік-логистикалық орталықтар; логистикалық компаниялар, автотехника өндірушілері мен дилерлері, вагон жасау және жөндеу зауыттары, логистикалық орталықтарды жабдықтауға арналған жабдықтарды жеткізушілер, қойма жабдықтарын өндірушілер, жүктерді өңдеумен және қоймаға қоюмен айналысатын компаниялар, бағдарламалық қамтамасыз етуді әзірлеушілер, процестерді автоматтандыру және жүйелік интеграциялау үшін IT-шешімдерді ұсынатын ғылыми және технологиялық компаниялар бар. Теміржол саласы бойынша «ҚТЖ-Жүк тасымалы», «Қазтеміртранс», «KTZ Express», және «Ақтау халықаралық теңіз сауда порты» сияқты отандық компаниялар да өз экспозицияларын ұсынады. Көрме аясында «Көлік және логистика нарығы» III Халықаралық конференциясы өтеді. Конференцияның екінші күні транзитті жетілдіруге және теңіз, әуе, автомобиль және теміржолды қоса алғанда, тасымалдау мәселелеріне арналады.