Жолаушылар тасымалындағы пойыз бригадаларының біліктілігін арттыру үшін онлайн-дәрістер өтуде
«Қазақстан теміржолшысы» газетінің тілшісі
Үстіміздегі жылдың 4 қазаны мен 12 қараша аралығында «Жолаушылар тасымалы» АҚ-ның екі мыңға жуық қызметкері ZOOM платформасында білім алады. Пойыз бригадалары мүшелерінің білімін арттыру мақсатындағы мұндай оқыту шаралары жыл сайын ұйымдастырылып тұрады. Біз «Жолаушылар тасымалы» АҚ-на қарасты «Экспресс» филиалының Астана телімінде өткізілген онлайн оқу барысын бақыладық. Телімнің өндірістік оқыту және техникалық мәселелер жөніндегі нұсқаушысы Нұрғали Батырханұлының айтуынша, оқыту тренингтерін арнайы мамандар – ішкі жаттықтырушылар өткізеді.
– Жолаушылар тасымалы қызметінде жолсеріктердің күйзеліске төзімділігі, адамдармен тіл табыса білуі сияқты негізгі қасиеттеріне басымдық беріледі. Оқу кезінде осы дағдыларды қалай дамыту керектігі айтылады. Біздің телімнен бүгін 30 шақты адам қатысып отыр. Сол сияқты республикамыздың барлық өңірінен әріптестеріміз білім көкжиегін кеңейтуде. Осы апта бойына өткізілетін тренингте күніне бірнеше тақырыптар қозғалады, – дейді ол.
Пойыз бригадалары құрамындағы пойыз бастығынан бастап, жолсеріктер, өндірістік оқыту нұсқаушыларына дейін бір апта бойына 6 тақырыпта, атап айтқанда, «Заманауи компанияның бизнес этика стандарттары», «Компанияның корпоративтік мәдениетін дамыту», «Коммуникативті құзыреттілік», «Компанияның сыбайлас жемқорлыққа қарсы саясаты», «Жұмысшының жеке бас мәдениеті», «Жұмысшының жеке бренді» деген мәселелер бойынша арнайы оқытылады. Кезекті оқыту аяқталғаннан кейін пойыз бригадалары құрамына сәйкесінше сертификаттар табыс етілмек.