Жамбылда қала маңына қатынаушылар жиіледі
Әлеуметтік маңызы бар жолаушы тасымалы облыс бойынша бірнеше бағытта жүзеге асырылады. Өткен жылы Әулиеата өңірінде қала маңы тасымалын 42 140 жолаушы пайдаланған.
Бүгінгі күні қала маңы тасымалы бірнеше бағытты қамтып отыр. «Жамбыл-Жаңатас» пойызының бағыты – Тараз, Бурыл, Шайқорық, Аса, Жұма, Тамды, Қаратау, Ақтаутас, Шабақты, Жаңатас станцияларына аялдап, сол төңіректегі тұрғындарға қызмет көрсетті. Бұл бағыт тек қыс айларында ғана жүріп тұр. Жаз айларында тоқтайды. Жамбыл облысы дотациялық аймақ болғандықтан шығын көп.
Ал, «Шу-Шығанақ-Мыңарал» бағытындағы пойыз – Шу, Бірлік, Жиделі, Хантау, Сарыбұлақ, Қияқты, Қарасай, Бурылбайтал, Шығанақ, Үшбұлақ, Мыңарал станцияларын басып өтсе, «Шу-Отар» бағыты – Шу, Далқайнар, Көктөбе, Алайғыр, Құлақшын, Бел, Аңырақай, Шыңырау, Отар станциялары мен станцияға жақын орналасқан елдімекен тұрғындары пайдаланып отыр.
«Аталған бағыттарға бекітілген билет құны, яғни «Жамбыл-Жаңатас» бағытына 1027 теңге, «Шу-Отар» бағытына 909 теңге және «Шу-Шығанақ-Мыңарал» бағытына 1307 теңге, ал кәмелетке толмаған жолаушыларға толық билет құнының 50% құрайды» дейді мамандар.