Батыстан Алматыға қатынайтын пойыздарға қосымша вагондар қосылды
Ақтөбе облысы бойынша меншікті тілші
Батыс аймағында жаз маусымына байланысты Алматы бағытындағы жолаушылар пойыздарына сұраныс артады. Сондықтан биыл оңтүстік астанаға қатынайтын №24, №34 жолаушы пойыздарына екі вагоннан тіркеліп отыр.
Ақтөбе теміржол вокзалында ығы-жығы халық, жаз маусымына байланысты жолаушылар қарқыны екі есеге артқан. Өңір тұрғындарының арасында демалыс сапарын теміржол қызметі арқылы жоспарлайтындар да көбейген. Соның ішінде Алматы, Маңғыстау бағытындағы пойыздар билеті күні бұрын сатылып кетеді.
«Вагондарды тіркеу кестесін жасау кезінде жолаушылардың сұранысы ескеріледі. Қазіргі уақытта Алматы бағытына сұраныс өте көп. Туристік маусым қажеттілігін ескеріп, қосымша вагондар қосылып жатыр», – дейді Ақтөбе теміржол вокзалының басшысы Тойбазар Қуанышев.
Қазіргі күні Ақтөбе вокзалы тәулігіне 8 жұп және 11 тақ пойызын қабылдап отыр. Күніге үш мыңнан аса адам вокзал қызметін пайдаланады. Вокзал басшысының айтуынша, жолаушылардың дені жол жүру билеттерін теміржол компаниясының BILET.RAILWAYS.KZ сайты немесе «ҚТЖ билеттері» мобильді қосымшасы арқылы онлайн ресімдейді.
«Жолаушылар билет алуды электронды түрде рәсімдеуді меңгеріп алған, орын болмаған жағдайда «Күту парағы» арқылы сұраныс жасауды да біледі. Бірақ, сонда да вокзалдағы билет кассаларының алды босамайды», – дейді вокзал басшысы.