Қазақстан мен Өзбекстан жолаушылар тасымалы саласында серіктестікті нығайтуда
Астанада «Жолаушылар тасымалы» АҚ мен «Узбекистон темир йуллари» АҚ басшылығының жұмыс кездесуі өтті. Тараптар жолаушылар тасымалы саласындағы ынтымақтастықты дамыту және серіктестік қатынастарды нығайту жолдарын талқылады, деп хабарлайды Rail-news.kz.
Келіссөздердің қорытындысы бойынша Қазақстан мен Өзбекстан арасында туристік пойыздардың қозғалысы жөніндегі келісім жасалып, бірлескен жобаларды жүзеге асыру мақсатында жұмыс тобы құрылды. Бұл бағыттағы алғашқы маңызды қадамдардың бірі ретінде «Jibek joly» туристік пойызының іске қосылуы екі елдің теміржол компанияларының табысты ынтымақтастығының жарқын үлгісі болды.
Бағыттың жоғары танымалдығы мен оның екі ел үшін маңыздылығын ескере отырып, тараптар «Jibek Joly» жобасын дамыту және басқа да бағыттар бойынша ұқсас туристік маршруттарды ашу мүмкіндігін қарастыру туралы шешім қабылдады. Атап айтқанда, қазіргі уақытта Қазақстан мен Өзбекстанның туристік әлеуетін арттыруға бағытталған жаңа халықаралық «Астана-Самарқанд» бағытын ашу мәселесі талқылануда.
Кездесу барысында халықаралық бағыттардағы пойыз қозғалысының кестесін жолаушыларға ыңғайлы ету және жолаушылар ағынын ұлғайту мүмкіндіктері талқыланды.
Өзбекстан тарапының ұсынысы бойынша №1/2 «Алматы-Ташкент» пойызының қозғалыс кестесі өзгертіліп, енді жолаушылар үшін жөнелту және келу уақыттары қолайлырақ болды.
№1/2 «Алматы-Ташкент» пойызы Қазақстан мен Өзбекстан арасындағы көлік қатынасының маңызды құрамдас бөлігіне айналды. Өткен жылы бұл бағытта 72 мыңнан астам жолаушы тасымалданды, бұл маршруттың сұраныс деңгейінің артып келе жатқанын көрсетеді. Екі ел арасындағы қашықтық 988 км құрайды.
Кездесу барысында жолаушылар тасымалын басқару, жылжымалы құрамға техникалық қызмет көрсету, ақпараттық жүйелерді енгізу және онлайн билет сатуды дамыту бағытында тәжірибе алмасу мәселелері қарастырылды.
«Жолаушылар тасымалы» АҚ мен «Узбекистон темир йуллари» АҚ жолаушыларға қызмет көрсету сапасын жақсарту және екі ел арасындағы тасымал ағынын арттыру үшін ынтымақтастықты одан әрі жалғастыруға ниетті екенін мәлімдеді.
