ҚТЖ пойыздарымен жыл сайын шамамен 6 млн әйел жолаушы сапарлайды
«Жолаушылар тасымалы» АҚ пойыздарымен жыл сайын шамамен 13,5 миллион жолаушы тасымалданады, олардың жартысына жуығын әйелдер құрайды. Орта есеппен 6 миллионға жуық әйел жолаушы еліміздің теміржол бағыттары бойынша жыл сайын сапарға шығады, деп хабарлайды Rail-news.kz.
Жолаушылардың жайлылығын қамтамасыз ету — Ұлттық тасымалдаушы қызметінің басым бағыттарының бірі. Осы мақсатта компания пойыздарында арнайы әйелдерге арналған вагондар қарастырылған. Бүгінде мұндай вагондар 12 бағыт бойынша қатынайды.
Теміржол саласының тұрақты әрі қауіпсіз жұмысында әйелдердің үлесі айрықша. Бүгінде «Жолаушылар тасымалы» АҚ-да 3,5 мыңнан астам әйел қызметкер еңбек етеді. Олардың 1256-сы жолаушылар пойыздарының жолсерігі, ал 401-і билет кассаларында қызмет атқарады. Кәсібилік, жауапкершілік және жолаушыларға деген ілтипат – олардың күнделікті жұмысының басты қағидаты. Әйел мамандардың осы еңбегі теміржол тасымалының тұрақты жұмысын қамтамасыз етіп, жолаушыларға көрсетілетін қызмет сапасының жоғары деңгейде сақталуына маңызды үлес қосып келеді.
Мереке қарсаңында Ұлттық тасымалдаушы барлық әйелдерге — жолаушыларға да, компания қызметкерлеріне де — көрсеткен сенімі, адал еңбегі және еліміздің теміржол саласының дамуына қосқан үлесі үшін шынайы алғыс білдіреді.
