«ҚТЖ-Жүк тасымалы» АҚ-да түзетулер енгізіледі
«ҚТЖ-Жүк тасымалы» АҚ-да станцияның Техникалық-өкімші актісін (ТӨА) жасау тәртібіне түзетулер енгізу бойынша жұмыстар жүргізілуде. Қазіргі кезде жол бөлімшелері орталық аппаратқа ұсыныстары мен ескертпелерін жіберуде. Ал күзге қарай аталған құжаттың соңғы нұсқасы әзірленбек.
«Нормативті-техникалық құжаттамаларды дұрыс құру – қозғалыс қауіпсіздігін қамтамасыз етудің кепілі» ұранымен Алматы жүк тасымалы бөлімшесінде «Нормативті-техникалық құжаттаманы әзірлеу және жүргізу» тақырыбында семинар өтті. Семинарға қатысушылар станцияларда нормативтітехникалық құжаттамалардың мазмұны, жасалуы, уақытылы тексерілуі және өңделу деңгейін арттыру бойынша пікір алмасты.
«Станцияда маневрлік жұмыс өндірісі және пойыздардың қозғалыс қауіпсіздігін қамтамасыз ету барысында негізгі критерийлердің бірі, ол станцияның ТӨА талаптарын дәлме-дәл және мүлтіксіз сақтау болып табылады. Техникалықөкімші акті бойынша жұмыстың басты принципі – ықтимал тәуекелдердің алдын алу және болжау. Тасымалдың сенімділігі мен қауіпсіздігі маңызды құжаттың қаншалықты кәсіби және нақты жазылғанына байланысты болмақ. Яғни, қозғалыс қауіпсіздігінің мәдениеті осыдан басталады», – дейді «ҚТЖ-Жүк тасымалы» АҚ Техникалық саясат департаментінің бас менеджері Рита Енсебаева. Мамандар станцияның ТӨА құжатының үлгісін жасау барысында әр пункт егжей-тегжейлі зерделеніп және де барлық мүдделі құрылымдармен бірауыздан келісімге келгеннен кейін қабылданатынына сендіріп отыр. Демек, уақыт талабына сай жасалынып жатқан жаңа ТӨАнің станция қызметкерлерінің жұмысына оң ықпал етері анық.