Ең әдемі тауар кассирі

Өндірістік аймақта орын тепкен тораптық Жаңа-Семей станциясы қашанда қарбаласқа толы. Жүк пойыздарының ағыны толассыз, құрастырылып, жолға шығарылатын жылжымалы құрамдар саны жыл санап артып келе жатқан станцияда еңбек ететін қыз-келіншектер де аз емес.

Солардың арасында теміржолшылар әулетінен шыққан тауар кассирі Назира Тұмарбекованы ерекше атап өтуге болады. Ол станцияға небары жиырма жасында келіпті. Міне, ширек ғасырға жуық табан аудармастан еңбек етіп келеді.  

– Ең алғашқы қызметім бағыттама қосынынан басталды. Одан соң екі жылдай жүк қабылдап-тапсырушы болып еңбек еттім. Қазіргі қызметім – тауар кассирі. Бұл – жауапкершілігі өте жоғары мамандық. Біліктілікті, білімді, ұқыптылықты талап етеді. Біздің құзырымызға кіретін міндет те тым ауқымды, – дейді Назира Мұратбекқызы.  

Иә, уақытылы жол ақысын алу, қосымша төлемдерді қабылдау, тасымал құжаттарын тексеру, өңдеу мен тіркеу... тауар кассирінің жұмысы жеңіл емес. Бұл ретте жүк алушылармен, жүк жөнелтушілермен сыпайы қарым-қатынаста болу – басты міндет. Ал енді станцияның тұрақты клиенттері үшін Назира Жаңа-Семей станциясындағы ең әдемі, ең сыпайы да адал тауар кассирі деген абыройлы атқа ие десек, қателеспейміз.  

Оның жұмыс күні жоспарлау жиынынан басталады. Түнгі ауысымнан қалған құжаттарды қабылдап, алдағы жұмыстың бағыт-бағдарын нақтылау үшін жаңадан келіп түскен нұсқаулықтармен, бұйрықтармен танысады. Бір айта кетерлігі, тауар кассиріне құжаттарды рәсімдеу барысында мүлде қателесуге болмайды. Бұл тым қымбатқа түсуі мүмкін. Сол себептен клиенттермен жұмыс барысында ұқыптылық қажет. Келген барлық тасымалдау құжаттарын арнайы журналға тіркеп, жүк алушыларға АСУ ДКР арқылы жібереді. Ал жүкті тасымалдауға ұсыну кезінде жүк жөнелтушінің тасымалдау құжаты мұқият тексеріледі. Бұл ретте қағаз жүзіндегі экспорт құжаттардың жеделхаттағы сәйкестігі қадағалау басты орында тұрады. Сол тәрізді клиенттерге сенімхат арқылы құжаттар көшірмесін беруде де мұқияттылық қажет. Ал Жаңа-Семей станциясындағы логистикалық жұмыстар – жүк ағыны мен құрастырылатын пойыздар саны кластан тыс Семей станциясынан да әлдеқайда көп екендігін, күллі бөлімше бойынша бірінші орында тұрғанын ескерсек, оның жұмысының қаншалықты қауырт әрі жеделдікті талап ететінін түсінуге болады.  

– Өткен 2024 жылдың қазан айынан бастап тасымалдау құжаттары еліміз бойынша толықтай электронды нұсқаға ауысты. Бұл қағазға да үнемділік әкелді, өзіміз де жеңілдік сезіндік, – дейді Назира Мұратбекқызы.  

Күнделікті қайталанатын, бірсарынды, сырт көзге іш пыстырардай көрінетін мұндай жұмыстар ол үшін тұтас бір өмір десе де болғандай. «Тауар кассирі қызметі өзіме ерекше ұнайды. Басқа ешбір қызметке ауыстырмас едім. Станция – менің екінші үйім» дейді ол. Бірлігі бекем, ұйымшыл Жаңа-Семей станциясы Назира сынды білікті мамандарымен орынды мақтана алады.