Үздіктер қатарында

Осыдан біраз уақыт бұрын Абай облыстық Кәсіподақтар орталығы Жұмысшы мамандықтар жылының қорытындысын жариялады. Ол бойынша теміржолшы Жанар Ракишева аймақтағы ең үздік еңбек адамы ретінде танылды.

Жанар Серікқазықызы 1992 жылы еңбек жолын Семей вокзалындағы анықтама бюросында анықтама беруші және диктор болып бастаған. 2003 жылы Алматы қаласындағы Жол қатынастары университетіне тасымалды ұйымдастыру және қозғалысты басқару мамандығы бойынша сырттай оқуға түсіп, білімін жетілдірді.  

2014 жылы вокзал бастығының кезекші көмекшісі болып ауысады. Бұл өте жауапты қызмет. Себебі вокзал жұмысының тәулік бойы үзіліссіз және қауіпсіз жүргізілуін қамтамасыз ету қажет. Одан бөлек, жолаушылар ағынын реттеу, олардың қауіпсіздігін бақылау және туындаған мәселелерді жедел түрде шешу міндеті де тұр. Бұл ретте Жанар анықтама бюросының, кассалардың, күту залдарының және басқа да қызметтерді үйлестіріп, жұмыс ырғағының қалыпты өтуі жолында қалтқысыз еңбек етіп келеді. Пойыздардың келуі мен кетуі туралы ақпаратты бақылау, кешігулер, өзгерістер болған жағдайда жолаушыларға дер кезінде хабарлау да оның құзыретіне кіреді.  

Вокзалдағы міндет мінсіз болуы тиіс, себебі диспетчерлік қызметпен тұрақты байланыс орнату, төтенше немесе штаттан тыс жағдайлар орын алған сәттерде дереу ақпарат беру керек. Бұл өз кезегінде қалыптасқан ахуалды дұрыс бағалауды, қырағылық пен талапшылдықты да қажет етеді.  

Оның сыртында вокзал аумағындағы тәртіп пен санитарлық тазалықтың сақталуын бақылау, жоғалған заттар, құжаттар немесе жолаушыларға қатысты оқиғалар бойынша тіркеу жүргізу және тиісті органдарға хабарлау сынды жауапты міндеттер де тұр. Осы ретте Жанар Серікқазықызы қажет жағдайда қауіпсіздік қызметімен және желілік полициямен де бірігіп жұмыс жүргізеді.  

Арыз-шағымдарды қабылдау, жолаушыларға кеңес беру, ауысым журналын жүргізу, тәуліктік есеп тапсыру және жұмыс орнына келген кезекшіге жұмысты тапсырып, қызмет барысындағы ахуалды қысқаша баяндау Жанар үшін қалыпты ырғаққа айналды. Десек те, вокзал қызметінің моральдық тұрғыдан да жауапкершілігі бар. Жанар сан мәрте пойыздан кешіккен, құжаттарын жоғалтқан жандарға жәрдем көрсетіп, алғыс-батасын да алып жүр. Қызметтегі жетістіктері үшін иеленген марапаттары, алғыс хаттары бір төбе.  

– Семей теміржол вокзалының ұжымы тығыз ымыраластықта жұмыс жүргізетін, береке-бірлігі мығым кәсіби мамандардан тұрады. Ұжымдағы әріптестер арасында өзара көмек көрсету, сыйластық және қызметтік тәртіп жоғары деңгейде сақталған. Кейінгі толқын жас қызметкерлерге жол көрсетіп, тәжірибе бөлісуде де елеулі іс бар. Бұл орайда бүгінде аға буын маманға айналған, өз ісінің хас шебері, ширек ғасырға жуық тәжірибесі бар Жанар Серікқазықызының қосып келе жатқан үлесі жоғары. Еңбек адамының қызмет барысындағы алар жетістіктері әлі де алда екеніне сенімдіміз, – дейді бұл орайда кезінде Жанармен бір ұжымда еңбек еткен, вокзал басшысы қызметін атқарған, бүгінгі «Қазтеміржолкәсіп» ҚБ Семей өңірі бойынша өкілі Есен Қажығұлов.