Қарбаласқа толы күн

Тараз станциясы арқылы тәулігіне 75 жуық жүк пойызы өтсе, 24 пойыз станция парктерінде сұрыпталып, Түрксіб, Шу, Алматы, Жаңатас және Шымкент, Арыс, Қазығұрт бағыттарына жөнелтіледі. Соңғы уақытта жүк айналымы жоғарылай түскен. Айналым көбейген сайын жұмыс ауқымы да артатыны түсінікті. Мұндайда күш алдымен құжаттармен жұмыс істейтін техникалық операторларға түсетіні анық.

Іздеген кейіпкерімізді күтіп, жұмыс процесін сырттай бақылап тұрып, уақытпен санаспай еңбек ететін теміржолшылар арасында жаратылысы нәзік әйелдердің үлес салмағы басым екенін ойладым. Тек кеңсе қызметінде ғана емес, өндірістік құрылымдарда, станцияларда, вокзалдар мен деполарда жұмыс істеп жүрген нәзік жандардың ерік-жігерінің мықтылығына еріксіз таң қаласыз...  

Тараз станциясының операторы Ләззат Асанова сонау тоқсаныншы жылдардағы тоқырау кезінде жолдасымен екеуі Қызылордадан Жамбыл жеріне жұмыс іздеп келіп, темір жолдан нәпәқа тауып, осында тұрақтап қалыпты. Бүгінде таңдаулы теміржолшының бірі.  

– Біз теміржолшы әулетінің іргесін өзіміз қаладық. 1995 жылы жолдасым Бақытжан Молдабеков Тараз станциясына пойыз құрастырушы болып жұмысқа орналасты. Отыз жылдан астам уақыт бойы осы жерде табан аудармай табысты еңбек етіп келеді. Мен бастапқыда төрт жылдай қара жұмыс істедім, қоймашының орнына ауысып, жұмысшыларға форма тараттым. Сосын теміржол сияқты салада білімсіз күн жоқ екенін түсініп, жергілікті колледжде оқып, мамандық алдым. Міне, бес жыл болды, станцияда оператормын. Тараз станциясына келетін жүк пойыздарының есебін компьютерге енгіземін. Есеп жүргізушілер парктерде сұрыпталатын вагондардың мәліметтерін ДУ-01 формадағы пойыздың құжатын толтырып әкеледі. Соны 02 үлгісінде толтырып, базаға енгіземіз. Есеп дайын болғанда электровоз машинисіне беріп, әрі қарай пойыздарды Түрксіб, Шу, Алматы, Жаңатас және Шымкент, Арыс, Қазығұрт бағыттарына жөнелтеміз. Бір күн – күндізгі, келесі күні түнгі ауысымға шығып, екі күн демала мыз, жұмыс өте ыңғайлы, – дейді Ләззат Омарбекқызы.  

Әрине техникалық оператордың жұмысы тіпті де оңай емес. Мәлімет қате енгізілсе, автоматты жүйе: «Станция бойынша кезекшінің автоматтандырылған жұмыс орны» – АРМД бағдарламасы есепті қабылдамай қояды. Сол үшін пойыздың нөмірі дұрыс енгізілуі керек, вагондардың салмағы белгіленген тоннадан асып не жетпей қалмауы тиіс.

«Алғаш оператор болып ауысқанымда осында 44 жыл еңбек еткен, бәрімізге тәлімгер болған Меңсұлу Шырмаметқызынан көп нәрсені үйрендім. Ол кісі қазір зейнетте. Әріптесім Наташа Роленкоға да айтар алғысым аз емес. Жас та болса, жұмыстың қыр-сырын әбден меңгерген маман. Ауысым сайын екеуіміз қатар түсеміз», – деген Ләззат Асанова кәсібін меңгеруге, үш ай сынақ мерзімінен өтуге, емтиханды жақсы тапсыруға көмектескен әріптестеріне шын көңілден алғыс айтты.  

Он-он бес минут алтын уақытын бізге арнаған жанмен жылы қоштастық. Ал станция операторының қарбаласқа толы күні қайта жалғасты.