Кәсіби шыңдалу мектебі

Қызылорда локомотив пайдалану депосында бір жылы кем аттай қырық жыл еңбек етіп келе жатқан Марияш Егембаева – машинистер жұмысын қадағалап, үйлестіретін жауапты маман.

Депо нарядшысының негізгі қызметі – локомотив бригадаларының жұмысын ұйымдастырып, ауысымға дұрыс әрі уақытылы шығуын қамтамасыз ету. Сапардан келген, сапарға шығатын машинистер бригадасының жұмысын реттеп отыру, солардың физикалық, психологиялық хал-ахуалдарын да назардан тыс қалдырмай қадағалап отыратын, бригадаға қатысты барлық жайды қадағалайтын аса жауапты маман.  

– Машинист пен көмекшілерді пойыз кестесіне сәйкес ауысымға бөлу, олардың біліктілік рұқсатының сапарға шығатын бағыт учаскесі бойынша сәйкестігін тексеру, жұмыстан бос уақытындағы демалыс уақыты мен еңбек тәртібінің сақталуын қадағалау, сапарға аттандырар алдында әр бригадаға рейс алдындағы тапсырманы рәсімдеу, пойыз нөмірі, бағыты, локомотив туралы мәлімет беру, қажетті құжаттар дайындап, тіркеу жұмыстарын жүргізу, т.т. толып жатқан жұмыстар біздің құзырымызда, – дейді Марияш.  

Жалпы алғанда, нарядшы – локомотив депосының ұйымдастыру өзегі. Оның жұмысы дәл болмаса, пойыз қозғалысының ырғағы бұзылады. Жоғары жауапкершілікті, ұқыптылықты және теміржол тәртібін жетік білуді талап ететін жұмысты атқару кез келгенге сеніп тапсырылмайды.  

– Біздің депоның нарядшылары өздеріне тапсырылған жұмыстарды кәсіби деңгейде атқарады. Марияш осы қызметке келгенге дейін талай сатыдан өтті. Бүгінгі міндеті – локомотив бригадаларын, олардың жұмыс және демалыс режимін бақылау, еңбек заңнамасына және салалық нұсқаулықтарға сай сағат нормасын есептеу, артық жұмыс уақытына жол бермей, резервтегі бригадаларды жоспарлау секілді жұмыстарды жүргізумен қатар, демалыс режимін бақылап, есеп жүргізіп, оперативтік жағдайларда әрекет етуін реттеп, қадағалап отыру. Сонымен қатар болып қалуы мүмкін оперативтік жағдайларда қозғалыс қауіпсіздігін қамтамасыз ету мақсатында толық құрамды бригада жіберу, бригадаларды кенеттен ауыстыру қажеттігі туындағанда, кешігу, сырқаттану кезінде шұғыл шешім қабылдайтын да осы Марияш секілді мамандар. Бұл тұрғыдан алғанда Марияш Дәулетқызы өз міндетін бес деген бағаға орындап жүрген маман, – дейді Қызылорда локомотив пайдалану депосының бастығы Нұртай Байғазы.  

Ал Марияш болса, депо – менің кәсіби шыңдалу мектебім дейді.