Еңбегі берекелі билет кассирі

Вокзал – темір жол көлігін пайдаланушы жолаушылардың шоғырланған орны. Мұнда күн сайын жүздеген адам әр бағытқа билет алып кетіп жатады. Ал сол адамдарға қызмет етуші ең алдымен билет кассирлері. Олар күн демей, түн демей сол жүздеген жолаушылардың көңілін тауып, діттеген жеріне дейін жетуі үшін билет сатып қана қоймай, қалай жетудің бағытын да түсіндіріп жатады. Солардың бірі – Атырау вокзалының билет кассирі Бисалиева Қалампыр отыз екі жылдан бері бір орында бір қызметті атқарып келеді. 

Өзі де вокзал салынған 1975 жылы сол маңдағы Елшібек ауылында дүниеге келген. 1973 жылы Гурьев станциясы пайдалануға берілгенде станцияға алғаш жұмысқа тартылған теміржолшылардың көбі де сол ауылдың адамдары болып еді. Қалампыр қаладағы № 9-шы мектепті бітіріп, Гурьев политтехникумына оқуға түседі де, оны 1994 жылы бухгалтерлік есеп мамандағы бойынша бітіріп шығады. Содан бері вокзалда билет кассирі болып еңбек етіп келе жатыр. 2002 жылы Манарбек есімді жігітпен отбасын құрды. Бір ұл, бір қызы бар. Ұлы Әнуәрбек мұнайшы болса, қызы Жадыра Еуразия университетінің студенті.  

- Өрімдей жас кезімнен бастағаннан да шығар, мен өз мамандығымды жақсы көремін. Жауапкершілігі мол жұмыс, өйткені халықпен және қолма қол ақшамен жұмыс жасайсың. Күніне билет алуға қаншама адам келеді, олардың мінез-құлқы да әр түрлі болады, сондықтан салмақты диалог арқылы сөйлесу керек. Келімді-кетімді басқа ұлт өкілдері де көп, олар кейде ойын жеткізе алмай қиналып жатады. Барынша түсініп, түсіндіріп айтасың. Бір ауысымда ондаған адамға билет сатып қана қоймай, қай жерден мініп, қай станциядан түсетінін де тәптіштеп түсіндіру біздің міндетіміз. Яғни, жолаушыға қызмет көрсетуде кемшілік болмауы тиіс, - дейді Қалампыр өз жұмысының мән-жайын түсіндіріп.  

Билет кассирлерінің жұмыс уақыты – бір ауысымда 12 сағат. Сол уақытта түрлі жағдайдағы адамдар келеді екен. Соның ішінде билетке ақшасы жетпей тұратындары да кездеседі. «100, 50, 20 теңге ақшасы жетпей қалатындар болады. Ондайда өзіміз аяп, жолынан қалмасын деп  жанымыздан қосып жібереміз. Құжатын ұрлатып алғандар, тіпті тамаққа ақшасы жоқ жолаушылар да болады. Аш қой деп тамағына да бересің. Әйтеуір жолынан қалмасыншы дейсің ғой. Бір билет кассирі күніне орта есеппен 200 билет сататын болса, сол уақытта әр түрлі оқиғалар болып жатады» дейді Қалампыр. Ия, 12 сағат бойына тек ауызбен емес, қолмен де, мимен де, жүрекпен де жұмыс жасау оңай емес. Ең бастысы – жолаушының жолынан қалмауы. Кейбірі кешігіп келіп сан соғып жатады, біреулері билетті кері тапсырады, бірі ақшамды толық қайтармадың деп дау шығарады. Әйтеуір тынымсыз тірлік. Бірақ, сонда да сабырлық сақтап, жолаушыға жайымен түсіндіріп, билет сатушы ғана емес, психолог болуды да қажет ететін мамандық екен. «Қалампыр өз жұмысына тыңғылықты қарайды, жауапкершілікті сезіне білетін маман. Мінезі ашық, жайдары, халықпен жұмыс жасай біледі. Сол үшін де басшылық тарапынан марапаттарға ие болды. Ұжымда сыйлы» дейді вокзал кассасының меңгерушісі Ажар Ахметова.  

- Әйелдер, аналар мерекесімен барлық теміржолшы әріптестерді құттықтаймын және соған мүмкіндік сыйлаған «Қазақстан теміржолшысы» газетіне рахмет. Бәріміз де ұл-қыз тәрбиелеп отырған анамыз ғой. Сондықтан да ақын Толымбек Әлімбекұлы айтқандай, «Бір қолымен бесікті, бір қолымен әлемді тербетіп отырған» аналар мерекесі барша аруларға қуаныш сыйласын, дендеріңіз сау, өмірлеріңіз бақыт пен сыйластыққа толы болсын! – деген Қалампыр Жұмабайқызы баршаға ақ тілегін арнайды.