Теміржолшылар әулеті үздіктер қатарынан көрінді

Маңғыстаулық Бекболсыновтар әулеті «Еңбек жолы» өңірлік конкурсының «Үздік еңбек әулеті» номинациясы бойынша екінші орын алып, қаржылай сертификатпен марапатталды.

Бірнеше буын теміржолшылар ұрпағы жалғасып келе жатқан бұл әулеттің бір мүшесі – бүгінде Маңғыстау магистральдық желі бөлімшесінде еңбек ететін Фариза Бекболсынова. Сонау түбекке теміржол тартылған жылдары еңбекке араласқан атасының жолын жалғаған ару 2014 жылдан бері еңбек етеді. Қазір Маңғыстау магистральдық желі бөлімшесінде жетекші инженер-эколог қызметін атқарады. Ол – бұл әулеттегі үшінші буын теміржолшы.

– Темір жол – біздің тағдырымыз, теміржолшы – кәсібіміз. Бірнеше ұрпаққа жалғасқан адал қызметіміз бағаланып, еленіп жатқанына қуаныштымыз. Теміржолшы мамандығы – біз үшін жай ғана мамандық емес, атадан балаға жалғасқан өмірлік ұстаным, жауапкершілік пен абыройдың символы. Әулетіміздің еңбек жолының негізін қалаған атамыз Бекболсын Айтжан 1963 жылдан 2002 жылға дейін Бейнеу жол дистанциясында қарапайым жол жөндеуші қызметінен телім бастығына дейін көтерілген, «Құрметті теміржолшы» атанған атақты жолшы болды. Бүкіл еңбек ғұмырын теміржол саласына арнаған әжеміз Үзілдік Айтжанова 1963–2001 жылдары Бейнеу станциясында жүк қабылдап алушы болған. Әкем Бердіқұл Айтжан да Бейнеу жол дистанциясында өмірінің соңына дейін, яғни 2014 жылға дейін еңбек етті. Анам Азила Айтжанова 39 жыл жол дистанциясында есепші болды. Мен де сол кісілердің сара жолын жалғастырып келе жатқаныма мақтанамын, – дейді Фариза Бекболсынова. 

Өзіне ең жақын жандардың жүрген жолымен жүріп, тек қана алға деген ұстаныммен еңбек етіп жүрген ол бөлімшедегі үлгілі қызметкер саналады. Түрлі сайыстарға қатысып, мекемедегі іс-шаралардың көрігін қыздырып жүрген белсенді жан. Өткен жылдары ҚТЖ-ның 120 жылдығына арналған «Теміржолшы әулеті» челленджіне қатысып, әулетінің тарихын мекеме шежіресіне енгізген еді.