Бейнеу станциясында санитарлық-карантиндік жаттығу өтті
Маңғыстау облысы бойынша меншікті тілші
Маңғыстау бөлімшелік көліктегі санитарлық-эпидемиологиялық бақылау басқармасына екі бірдей жағымсыз хабарлама түсті.
Бірі №8801 «Карақалпақ-Бейнеу» жұмысшы пойызынан, екіншісі Құрық портынан «Хусейн Джавид» буксиріндегі жолаушының жағдайына байланысты болды. Бейнеудегі жағдайда жұмысшы пойызы вагонында жолаушының қатты ауырып, қалтырап, дене қызуы көтеріліп, қолтық асты безі ісініп, денсаулығы нашарлағаны айтылады. Құрық портынан келген ақпарда кезекші диспетчер қызметіне кеме буксиріндегі жолаушының да жүрегі айнып, лоқсып құсуы, іші өтуі, басы айналып, аяқ-қол бұлшық еттері тартылу сияқты шағымдармен мазасызданып келе жатқаны баяндалады.
Аталған деректер бойынша Бейнеу станциясының санитарлық-карантиндік бөлімі мен Құрық станциясының санитарлық-карантиндік бөлімінің мамандары дереу мүдделі мекемелерге хабар беріп, тиісті шараларға кірісті.
Бұл – Маңғыстау бөлімшелік көліктегі санитарлық-эпидемиологиялық бақылау басқармасының кезекті оқу-жаттығуларының сценариі болатын.
Бейнеу станциясы мен Құрық портында өткен бұл іс-шара оба және тырысқақ ауруларының алдын алу және анықталған жағдайда жоспарға сай әрекет ету даярлығын тексеру бағытында ұйымдастырылды, – дейді Маңғыстау бөлімшелік көліктегі санитарлық-эпидемиологиялық бақылау басқармасы басшысы Ағзия Темірқасова.