Бейнеу станциясында жұмысшы пойызынан «маймыл шешегі» анықталды

Бейнеу станциясында жұмысшы пойызынан маймыл шешегі анықталды. Әрі қарай мамандар қалай әрекет етті, нендей шаралар қабылдады? Оның бәрі станцияда өткен оқу-жаттығу барысында мәлім болды.

Оқу-жаттығу жұмысына станциядағы қажетті құрылымдардың өкілдері түгел қатысты. Жаттығу жұмысының мақсаты жұқпалы ауруға күдікті науқас анықталған кезде шұғыл алдын алу және эпидемияға қарсы іс шараларды ұйымдастыру алгоритмін пысықтауға негізделген. Ауруды таратпау, жедел жәрдем көрсету жолдары пысықталды.  

– Бейнеу санитариялық-карантиндік бөлімінің мамандары Маңғыстау бөлімшелік санитариялық-эпидемиологиялық бақылау басқармасының мамандарымен бірігіп көлік құралында инфекцияны оқшаулау және ҚР аумағында таралуына жол бермеу жөніндегі оқу-жаттығу жұмысын өткізіп отырмыз. Оған мүдделі қызметтер, Бейнеу станциясындағы теміржол мекемелерінің қызметкерлері, аудандық санитариялық-эпидемиологиялық бақылау басқармасының мамандары, шекара, кеден қызметтері, ішкі істер органдарының, медициналық мекемелерінің қызметкерлері қатысты. Алдын алу жұмысы барысында қатысушы мамандар маймыл шешегі анықталған жағдайда алгоритм бойынша іс-әрекеттерін және үйлесімді әрекет етуге дайындығын көрсетті. Жаман айтпай жақсы жоқ, мұндай ауру кездесе қалған жағдайда жолаушылар мен қызметкерлердің қауіпсіздігі – біздің басты басымдығымыз. Соған сай әрекет ету шараларын пысықтау өте қажет, – дейді Маңғыстау бөлімшелік көліктегі санитариялық-эпидемиологиялық бақылау басқармасының басшысы Ағзия Темірқасова.

Маймыл шешегі – қауіпті ауру. Ол маймыл шешегі вирусынан туындайтын зооноздық жұқпалы ауру. Инфекцияның таралу көзі – ауру маймылдар мен ауру жұқтырған адамдар. Берілу жолдары: әсіресе науқастың бөртпелері мен биологиялық сұйықтықтары, яғни жара қабыршағы, сілекейі. Тұрмыстық жағдайда ауру жұқтырған адамның төсек-орны, сүлгілері немесе жеке заттары арқылы және жыныстық жолмен беріледі.