Дегелең мен Семей станциялары аралығында теміржол мүлкі мен жүк қауіпсіздігі тексерілді
Абай облысы бойынша меншікті тілші
Семей теміржолында желі бойындағы құқықбұзушылық пен қылмыстың, соның ішінде ұрлық фактілерінің алдын алу бағытындағы жұмыстар үзіліссіз жүргізіліп жатыр. Оған Әскерилендірілген күзет қызметі, оның ішінде Семей филиалы да өз үлесін қосуда.
Жуырда филиал басшысы Самат Райымбековтің тікелей жетекшілік етуімен Дегелең және Семей станциялары аралығындағы телім бойында жедел алдын алу іс-шаралары өткізілді. Бұл жұмыстар рейдтік бақылаудан өзгеше. Себебі желі бойындағы Жалпақ, Талды, Көл, Шаған, Известковая сынды шағын станцияларда із кесу жүргізілді. Соның ішінде бірінші кезекте жүк вагондарындағы ұрлық, бекітпе-пломбалардың бүлінуі, тасымалдаған жүктің сақталуы, теміржол мүлкінің амандығы сынды факторлар басты назарға алынды.
Мұнымен қоса, ең көп кездесетін ақаулық – ленталардың үзілуі, сымдардың босауы немесе үзілуі сынды техникалық талаптардың бұзылуына жататын тосын жайттар да қаперден тыс қалмады.
Сонымен қатар қадағалау жұмыстары барысында теміржолшылармен әңгімелесу жүргізілді. Мақсат – желі бойында күдікті жайттар туындаған шақта құзырлы орындарға бірден хабарлау, жүктерді жеткізу мен сақтаудағы негізгі міндеттер жайында кеңінен әңгіме өрбіді.
Сол тәрізді жол айрықтары мен жүк станцияларындағы «ӘТЖК» ЖШС Семей филиалы қызметкерлерінің тосын жайттарға даярлығы да пысықталды.
Ал өткізілген іс-шараның нәтижелері бойынша жүктің ұрлану белгілері, вагондардың бүлінуі және тасымалданатын мүліктің қауіпсіздігі мен сақталуына қауіп төндіретін және өзге де заң бұзушылықтар анықталған жоқ. Учаскелердегі қалыптасқан ахуал тұрақты күйінде қалып отыр және ұдайы бақылауда.
Кейінгі жылдарда бөлімше көлемінде транзиттік жүк пойыздарының ағыны әлдеқайда артқан. Сол себепті әр ауысымдағы күзет қызметкерлері де жұмыс барысын ширата түсуде. Мәселен, Семей, Жаңа-Семей сынды тораптық жүк станцияларында шамамен 35-40 адам станция басына келіп тоқтаған әрбір жүк пойыздарының амандығын толыққанды тексеріп, қатаң түрде бақылауға алады. Демек, тасымалдағы жүктер қырағы көздердің назарында деуге толық негіз бар.