Ақтөбе вокзалында тазалық жұмыстары күшейтілді
Ақтөбе облысы бойынша меншікті тілші
Ақтөбе облысының әкімі теміржол вокзалын аралап, қоғамдық орындағы тазалық жұмысын күшейтуді тапсырды.
Қазір күн салқындап, тұмаурату жағдайының көбеюіне байланысты вокзалдарда карантиндік талаптар қайта күшейген. Жолаушылар арасында арақашықтықты сақтау, антисептик пайдалану тәртібі қадағалауға алынған. Вокзалдағы радио хабарландырулардан жиі-жиі сақтық шаралары ескертіліп, жеке гигиена тазалығын сақтау ескертіледі.
«Вокзалдың стратегиялық аймақ екенін жолаушыларға үнемі ескертіп отырамыз. Перрондағы қауіпсіздік барынша бақылауға алынған. Билет кассаларының алдында қашықтықты сақтау тәртібі қадағалануда. Антисептиктер жиі толтырылып, тазалыққа қатты көңіл бөліп жатырмыз», – дейді Ақтөбе теміржол вокзалының басшысы Тойбазар Қуанышев.
Вокзал ғимаратының кіреберісіне қойылған компьютерлік бағдарлама бір мезетте 30 адамның дене қызуын өлшеп, тексеріп кіргізеді. Сонымен бірге вокзалда күніге бірнеше мәрте ылғалды тазалау жұмыстары ұйымдастырылған.