Мереке иелерінің мерейі өсті
Халықаралық әйелдер күніне орай елордалық теміржол вокзалдарының перрондары мен пойыздарында жүзден астам әйел жолаушыларға гүлдер мен сыйлықтар табысталды. Әйелдер қауымына саксофон әуені мерекелік көңіл-күй сыйлап, ал пойыздың ішінде дауыс ұлғайтқыш арқылы тілектер айтылды.
Сыйлық алған әйелдер қауымы ықылас лебіздерін айтып, жолсеріктерге алғыстарын білдірді. Сондай-ақ, бұл күні еліміз бойынша 8 Наурыз мерекесіне арнайы безендірілген пойыздар жолға шықты. Ұлттық тасымалдаушы мереке күндері нәзік жандарды жыл сайын құттықтауды жақсы дәстүрге айналдырып отыр. Мереке қарсаңында ел өңірлеріндегі жол бөлімшелерінде де теміржолшы ер азаматтар әріптес қыз-келіншектерді құттықтап, мерекелік көңіл-күй сыйлай білді. Мәселен, «ҚТЖ-Жүк тасымалы» ЖШС – «Батыс» филиалы мен «ҚТЖ» ҰК» АҚ Ақтөбе магистральдық желі бөлімшесінің жігіттері әйелдер мерекесінде қыздарға арнап концерттік бағдарлама ұйымдастырып, қызғалдақ сыйлап, сый-сияпат тарту етті.
Ал мереке қарсаңында Қандыағаш станциясының көркіне ақылы сай арулары «Ал қанекей, қыздар» байқауында сайысты. Сайыс шарты бойынша арулар екі адамнан үш топқа бөлінді. Бес кезеңнен тұратын сайыстың негізгі міндеті – әр кезеңді қатысушылар біріге отырып орындау арқылы ұжымдық ауызбіршілікті көрсету. Сәлемдесу кезінде сөйлеу мәнеріне аса мән берілсе, байқаудың келесі шарттарында қатысушылар өнер, ас әзірлеу шеберлігі, спорттық сайыс арқылы сыналды. Сондай-ақ салт-дәстүр қойылымдарын көрсетті. Байқауға қатысушы қыз-келіншектердің барлығына сайыс соңында сыйлықтар тарту етілді.
Ал Жамбыл өңірінде күрделі сала теміржолдың әртүрлі қызметінде еңбек көрігін қыздырып отырған теміржолшы қыз-келіншектерді жол бөлімшесінің директоры Айдын Сеитбенбетов Алғыс хаттармен марапаттап, сый-құрмет көрсетті. Сондай-ақ бұл күні еңбекке адалдығымен, жұмысқа тиянақтылығымен көзге түскен мереке иелеріне «AMANAT» партиясы Жамбыл облыстық филиалы төрағасының орынбасары Ермұхан Жұмабек Құрмет грамоталары және Алғыс хаттар тапсырып, сый-сияпат жасады. Мереке иелеріне ізгі тілегін жеткізді.
Ардақ ЕРУБАЕВА, Ақтөбе
Ардақ ҮСЕЙІНОВА, Жамбыл