Мектеп түлектеріне кәсіби бағдар берілді (Фото)
Қызылорда облысы бойынша меншікті тілші
Қазақстан темір жолының 120 жылдық мерейтойына орай Сексеуіл локомотив пайдалану депосында тамаша бір шара өтті.
Сексеуіл кентіндегі орта мектептің 10-сынып оқушылары ұстаздары Ерболат Төлегенов пен Болатбек Қылышбаевтың жетекшілігімен локомотив депосына келіп, кәсіби бағдар алды. Оларды қарсы алған депоның кәсіподақ ұйымының төрағасы Нұрлан Жұмқанов цехтарды аралап, тепловоздардың түрлерімен таныстырып, депо тарихына шолу жасап, естелік кітапшалар таратып және оқушылардың сауалдарына жауап берді.
– Кәсіп таңдауда үлкен мән бар. Болашақ кәсібін жаңылмай тапқан азамат елге де, өзіне де, отбасына да пайда әкеледі. Депоға келіп біздің жұмысымызға қызығушылық танытқан түлектерге бағыт-бағдар беріп, локомотив маманы, машинист болудың қыр-сырымен таныстырдық. Кім біледі, олардың арасынан болашақта талай теміржолшы шығар, – дейді кәсіподақ ұжымының төрағасы Нұрлан Жұмқанов.
Болашақ кәсібін таңдауға талпынған түлектер кездесуден зор әсер алып, депо қабырғасында естелік суретке де түсіп үлгерді.
