Ғасырдан астам уақыт жұмыс істеп келе жатқан депо

Қызылорда локомотив пайдалану депосы – ғасырдан астам уақыт жұмыс істеп келе жатқан байырғы кәсіпорын. Шиелі мен Қазалы станцияларында оның айналым деполары жұмыс істеп тұр.

Сыр бойындағы Түркістан-Шиелі-Қызылорда-Қазалы-Сексеуіл станциялары арасында жүк және жолаушы тасымалына қызмет көрсететін локомотив депосы өткен жылды табыспен қорытындылады. Тасымал жұмыстарының жоспары 98,5-116,1 пайыз аралығында орындалып, белгіленген межеден асып түсті. Жалпы тасымал жұмысының нәтижесі 19 097,398 млн ткм. бруттоға жетіп, жоспар 106,8 пайызға орындалған. Жалпы локомотив жүрісі 9 503 млн км-ге тең болса, оның желілік жүрісі 9 053,536 млн км болған. Локомотивтердің орташа өнімділігі 2 675,1 мың ткм.бруттоға жетіп, орташа тәуліктік жүріс 855,8 км-ді құрады. Локомотивтердің тиімді жұмысы тәулігіне 16,22 сағатты қамтыған.    

– Мұндай табысқа тетік болып отырған депо машинистері мен техникалық мамандардың үйлесімді еңбегі, заманауи технологияларды тиімді пайдалана білуінің және кәсіби шеберліктің нәтижесі десем артық айтпаған болар едім. Депода 600-ге жуық машинист пен машинист көмекшілері еңбек етеді. Тасымал үдерісінің қауіпсіздігі мен тиімділігі осы мамандардың кәсіби шеберлігіне тікелей байланысты. Сондықтан машинистер мен олардың көмекшілеріне қойылатын талаптар да жоғары. Олар үнемі техникалық оқу-жаттығулардан өтіп, білімі мен біліктілігін арттырумен болады, – дейді депо бастығы Нұртай Байғазы.

Теміржол саласында қауіпсіздік техникасының сақталуы әркез сақтала бермей, форс-мажорлық оқиғалар да орын алып тұратыны жасырын емес. Тек желтоқсан айында машинистер 12 рет жедел тежегішті басып, пойызды тоқтатқан. Себеп – жолға бөгде адамның шығуы, малдың жол жағалай жайылуы, жолға бөгде зат қойылуы, т.т. Ал жыл бойы депоның жұмыс аумағында мұндай қауіпті оқиғалар 218 рет қайталанған. Сондықтан төтенше жағдайлардың алдын алу үшін депо бойынша қауіпсіздік шаралары күшейтіліп, профилактикалық жұмыстар тұрақты жүргізілуде.