Еңбек адамына құрмет
Қызылорда облысы бойынша меншікті тілші
Қызылорда магистральдық желі бөлімшесінде еңбекқорлық пен кәсіпқойлықты дамыту, қарапайым еңбек адамдарын дәріптеу және олардың қоғамдағы рөлін арттыру мақсатында жиын өтті.
Шараға «Aманат» партиясының облыстық филиалының төрағасы Алмасбек Есмаханов және теміржол саласының ардагерлері, қалалық мәслихаттағы депутаттық фракцияның мүшесі Ибрагим Басықараев қатысты. Олар шойын жолда еңбек етіп жүрген теміржолшылардың еңбегін жоғары бағалап, көлік саласының маңыздылығын айрықша атап өтті.
2025 жыл Қазақстанда «Жұмысшы мамандықтар жылы» болып жарияланды. Бұл бастама еңбекқорлық пен кәсіпқойлық идеясын ілгерілетуге, жұмысшы мамандықтарын дәріптеу арқылы еліміздің экономикалық дамуына үлес қосатын мамандарды бағалауға бағытталған. Президент Қасым-Жомарт Тоқаевтың бұл бастамасы елімізде кәсіби мамандардың рөлін арттырып, қарапайым еңбек адамдарының қадір-қасиетін көтеруді көздейді.
Кездесуде Алмасбек Есмаханов партияның жұмысшы мамандықтарының мәртебесін көтеру бағытында атқарып жатқан шараларын сөз етті. Техникалық және кәсіби білім беру саласындағы жаңалықтар мен өзгерістерге тоқталды. Биылғы жылы мемлекеттік тапсырыстың 10 мың орынға артқанын, оның 65 пайызы техникалық мамандықтарға бөлінгенін мәлімдеді. Сонымен қатар әлемдік деңгейдегі оқу орындарының филиалдары өңірлерде ашылып жатқанын, жыл сайын шамамен 500 ғалым шетелде машықтануға мүмкіндік алатынын атап өтті.
Сонымен қатар Алмасбек Есмаханов аймақтың дамуына үлес қосқан теміржолдағы әулеттер мен сала ардагерлеріне құрметін жеткізіп, алғыс хат табыс етті.
