Еңбек адамына құрмет – елге құрмет

Темір жол – тіршіліктің күретамыры десек, сол «тамырдың» үзілмей, өз функциясын  мінсіз атқаруы осы салада тынымсыз еңбек етіп жүрген теміржолшылардың еңбегіне байланысты. Ал ақ-адал еңбекке құрмет көрсетіп, марапат жасау – ізгі қадамдардың бірі.

Қызылорда магистральдық желі бөлімшесінде өткен салтанатты жиын  теміржол саласына ұзақ жылдар бойы адал да абыройлы қызмет еткен еңбек адамдарының мерейін өсіріп, мәртебесін көтеруге арналды.  Бөлімше директоры Ербол Саулебеков өздерінің үздік қызметімен, қажырлы еңбегімен отандық теміржолдың табысына сүбелі үлес қосып келе жатқан аймақ теміржолшылары қандай құрметке де лайық екенін жеткізді.  

– Сіздердің көзге көріне бермейтін тынымсыз тірліктеріңіз, әрдайым елене бермейтін адал еңбектеріңіз арқылы бүгінгі таңда теміржол саласы үлкен жетістіктерге жетіп отыр. Жаңа жобалар мен инфрақұрылымдық жаңғыртулар жүзеге асырылып, кадрлық әлеуетті нығайту мен әлеуметтік қолдау бағытында орасан зор жұмыстар жүріп жатыр. Жобалары мен еңбек адамын марапаттау шаралары да ерекше қарқын алып отыр. «ҚТЖ» ҰК» АҚ басқарма төрағасы Нұрлан Сауранбаевтың бастамасымен теміржолшылар еңбегін бағалаудың жаңа жүйесі енгізіліп, марапаттар саны артып отыр. Біз сіздермен мақтанамыз. Марапат – ықылас пен құрметтің белгісі, – деген бөлімше басшысы бір топ сала майталмандарын «Теміржол саласына сіңірген еңбегі үшін», «Адал еңбегі үшін» төсбелгісімен және «Қазақстан темір жолына 120 жыл» мерейтойлық медалімен марапаттады.    

Жиында құрметке бөленген жандардың бірі – Шиелі өрт сөндіру пойызының бастығы Садық Арнауыт. Ол бұл салада 25 жылдан астам табанды еңбек етіп, үлкен беделге ие болған. Міне, бүгін бейнеттің зейнетін көруге бет бұрған ардагердің иығына шапан жабылып, ерекше құрмет көрсетілді. Ардагер өз сөзінде «теміржолшы болу – жүрекпен сүйетін кәсіп иесі атанып, ел экономикасына қызмет ету» деді.  

Жиында сонымен қатар түрлі марапатқа ие болып, мерейі өскендер қатарында бөлімше бастығының орынбасары Нұрлан Бимұратов, инженерлер Арман Жиенбаев пен Бақытжан Абрахманов, ШЧЗ Жанболат Досжанов, ЭЧ Алпамыс Сагимов, Бекзат Фаизов, Бейбіт Ділдабаев, Айгерім Дәулетбаева, Асылхан Төлепбергенов сынды  аймақ теміржолының айтулы тұлғаларына айналған майталмандар болды.