Теміржол ардагері құрметке бөленді
Қызылорда облысы бойынша меншікті тілші
Қазалы ауданының Құрметті азаматы, саналы ғұмырын теміржол саласының дамуына арнаған абзал азамат Жақсылық Көрпебаев 75 жасқа толды. Қызылорда ЖТ бөлімшесінің басшысы Батырхан Базарбаев бастаған топ сала ардагерін арнайы құттықтап, ықылас-құрметтерін білдірді.
Кездесу барысында бөлімше басшылары ардагердің жарқын еңбек жолын, өнегелі өмірін, кәсіби шеберлігін сөз етіп, ел игілігі үшін аянбай еңбек еткен азаматтың өмір жолы – бүгінгі ұрпаққа үлгі, ертеңгі буынға өнеге десті.
Жақсылық Мінәтұлы еңбек жолын 1968 жылы Қазалы теміржол училищесін бітіріп, Қызылорда локомотив пайдалану депосында машинист көмекшісі ретінде бастаған. Сол кезден бастап теміржолдың ыстығына күйіп, суығына тоңып, адал еңбегінің арқасында абырой биігіне көтеріле білді. Әскери борышын өтеп келгеннен кейін Қазалы локомотив депосында машинист, нұсқаушы, кейіннен Отын-май тарату базасының, ал 1993 жылдан бастап Қазалы қалпына келтіру пойызының басшысы қызметтерін атқарып, осы қызметтен 2013 жылы құрметті демалысқа шыққан.
Жақсылық Көрпебаевтың көпжылдық адал еңбегі мен қоғамдық белсенділігі ескерусіз қалған жоқ. Ол «Құрметті теміржолшы» төсбелгісімен, «Еңбек ардагері» медалімен, КСРО Жол қатынастары министрлігінің, Батыс Қазақстан теміржол басқармасының, Қазақстан темір жолы басшылығының Құрмет грамоталарымен, басқа да көптеген салалық марапаттармен марапатталып, бірнеше рет аудандық кеңестің және мәслихаттың депутаты болып сайланды.
1986 жылы Мәскеуде өткен теміржолшылар форумына делегат ретінде қатысып, КСРО Көлік министрінің қолынан марапат алған теміржолшы.
Зейнеткерлік ардагердің қоғамдық істерден шет қалуына себеп болған жоқ. Қазіргі таңда Қазалы тораптық ардагерлері кеңесінің төрағасы ретінде жақсы істердің ұйытқысы болып, жастармен жиі кездесіп, өзінің бай тәжірибесімен бөлісіп келеді. Сонымен қатар аудандық ардагерлер кеңесінің пленум мүшесі ретінде де түрлі қоғамдық бастамалардың бел ортасынан табылып жүр.
– Қоғамдық жұмыс – бұл жүрек қалауымен істелетін іс. Бүгінгі жастарға бағыт-бағдар беру, саланың қыр-сырын үйретіп, тәжірибемен бөлісу – аға буын біз үшін парыз, – дейді Жақсылық ақсақал.
Бөлімше мен кәсіподақ ұйымының басшылары теміржол саласының тарланбозына шапан жауып, сый-сияпатқа бөледі.