Жамбыл жол бөлімшесі ҰОС ардагерін құттықтады
"Қазақстан теміржолшысы" газетінің Жамбыл облысындағы меншікті тілшісі
Ұлы Жеңістің 80 жылдығына орай еліміздің барлық өңірлерінде маңызды іс-шаралар ұйымдастырылуда. Бұл – майдангерлердің рухына деген мәңгі құрметтің белгісі. Отан үшін от кешкен ардагерлеріміз қашан да ардақты. Мереке қарсаңында Жамбыл жол бөлімшесі ҰОС және еңбек ардагері Иван Макеевті Жеңістің 80 жылдығымен құттықтады.
«ҚТЖ-Жүк тасымалы» ЖШС «ЖТ Жамбыл бөлімшесі» филиалы директорының орынбасары Дәурен Құрманов, кадрлар бөлімінің басшысы Меруерт Баймұрзаева, Жамбыл бөлімшесі кәсіподақ ұйымының төрағасы Серік Ақшораев Тараз станциясындағы желілік полиция бөлімінде өткен мерекелік іс-шараға қатысып, ардагерге сый-сияпат тапсырды.
Отан қорғаушылар күні және Жеңістің 80 жылдығына орай ұйымдастырылған іс-шарада желілік полицияның жеке құрамы сапқа тұрғызылды. Үрмелі аспаптар ансамблі соғыс жылдары жазылған әндерді орындап, қонақтар бөлім аумағындағы ҰОС ардагерлеріне арналған ескерткішке гүл шоқтарын қойды. Тараз станциясындағы желілік полиция бөлімінің бастығы, полиция полковнигі Олег Родякин жеке құрамды мерекемен, ардагер Иван Федоровичті Жеңістің 80 жылдығымен құттықтап, шапан жауып, сый-құрмет көрсетті. Жамбыл облыстық полиция департаменті ардагерлер кеңесінің төрағасы Тұрдалы Шералин майдангерге Жеңістің 80 жылдығы мерекелік медалін тапсырды.
Соғыс басталған кезде Иван Макеев небәрі 14 жастағы жасөспірім екен. 17 жасында ол Кеңес әскерінің қатарына шақырылып, әрі қарай майданға жіберіледі. Жас жауынгер 1951 жылға дейін жапон империалистеріне қарсы шайқастарға қатысты. ІІ дәрежелі ҰОС орденімен және 20-дан астам медальдармен марапатталған. 1951 жылы елге оралған соң, 1953 жылы КСРО ІІМ Могилев арнайы көлік милициясы орта мектебіне оқуға түседі. 1955 жылы оқуды бітіргеннен кейін Жамбыл станциясындағы желілік ішкі істер бөліміне жұмысқа орналасып, 30 жыл қызмет етіп, подполковник шенінде зейнеттік демалысқа шыққан.
Теміржол бойындағы қозғалыс қауіпсіздігін қамтамасыз етіп, саланың дамуына үлес қосқан 98 жастағы ардагер Тараз қаласында тұрады. Жамбыл жол бөлімшесінің қызметкерлері майдангерге адал еңбегі үшін, Отан қорғаудағы ерен ерлігі үшін алғыс білдірді.
