Арыстағы біліктілік сайысы: вагон қараушылар шеберлігін сынады
Түркістан облысы бойынша меншікті тілші
Арыс вагон пайдалану депосына қарасты 6 техникалық қызмет көрсету қосыны бар. Шымкент бөлімшесінің барлық аумақтарын қамтыған вагон қараушылар қосыны Арыстан бөлек, Түркістан, Шымкент, Қазығұрт, Түлкібас, Сарыағаш станцияларында орналасқан.
Жуырда Арыс вагон пайдалану депосында дәріс түріндегі сайыс өтіп, оған барлық техникалық қызмет көрсету пункті (ПТО) қатысты. Алты мекемеден еңбек ететін вагон қараушылар мен жөндеушілер арасында білім арттырып, тәжірибе шыңдау мақсатында ұйымдастырылған шараға 16 теміржолшы қатысты.
Сайыс болған соң әрине ол тәртіп-талапқа сай өтуі тиіс. Оның бір алғышарты ретінде үміткерге теориялық білімін бағамдау мақсатында сұрақ-жауаптар қойылды. Мұнда қатысушымен болған әңгімелесу арқылы алдымен біліктілік сараланса, практикалық тәжірибе бөлімінде мамандардың қызметтік міндетін орындау сапасы сынға түсті. Яғни үміткер білгенін іске асыру барысында шеберлігін де паш етті. Мәселен, вагон доңғалағын балғамен қаққаннан кейін шығатын дыбысқа зейін қою арқылы оның ақауын анықтауды меңгеру үшін кез келген маманға уақыт керек. Демек, бұл уақыт өте келе тәжірибемен ұштасатын қарым-қабілет.
– Біз сайысқа қатысушылардың әлеуетін бағалауда осы әдісті әркез қолданамыз. Себебі маман біліктілігіне шынайы баға беруде бұл – таптырмас амал. Бүгінде осы амалды іске асыруда уақытқа қарап, тапсырманың шапшаң әрі сапалы орындалуына ден қойдық, – дейді ВЧД-30 – Арыс депосының бас инженері Ғалымжан Байзақов.
Айта кетейік, білім мен тәжірибе қатар сынға түскен сайыста Арыс вагон пайдалану депосы бастығының орынбасары Данияр Сейдахметов пен өндірістік оқыту шебері Пайызхан Қожанұлы және Марат Әлиакбаров сынды саланың қыр-сырын жетік меңгерген мамандар төрелік етіп, қатысушылардың көрсеткен нәтижелерін саралап, кіл мықтыны анықтады.
Ал екі кезеңнен тұратын сынақ нәтижесі бойынша алты ПТО-дан қатысқан үміткерлер арасынан Түркістаннан келген вагон қараушы Асқар Ғалымжан бірінші орынға лайық деп танылды. Ал екінші орынды шымкенттік вагон қараушы Жандос Кеңесбай еншілесе, үшінші орын Түлкібастан келген Нұржан Жандәулетовке бұйырды.
Шара аясында анықталған жеңімпаздарға өндіріс орнында қолданып, жұмыс өнімділігін арттыруға ыңғайлы құрал-жабдықтар сыйға тартылып, арнайы сертификаттармен марапатталды.