Қырағылық – кәсібилік белгісі

Арыс вагон пайдалану депосы Шымкент жүк тасымалы бөлімшесі бойынша аймақтағы вагон шаруашылығының қозғалыс қауіпсіздігін сақтайтын жалғыз мекеме болып табылады. Оның құрамында 6 техникалық қызмет көрсету пункті мен 12 бақылау бекеті және 6 ағымдағы ағыту-жөндеу қосыны бар. Кәсіпорынның қызмет көрсету бағытындағы кепілдік иіні 2 578 шақырымды құрайды.

Вагон қараушының негізгі міндеті – жылжымалы құрамнан ақаулы вагонды анықтау болып табылады. Соңғы жылдары депо мамандары кінәраты бар вагондарды анықтауда едәуір жетістікке жетіп, түрлі қауіп-қатердің алдын алуға елеулі үлес қосып келеді. Айталық, жуырда ғана Түлкібас техникалық қызмет көрсету пунктінің вагон қараушысы Дәурен Тілешов №2234 пойыздың құрамындағы №58771973 вагонның бүйір рамасынан жарық анықтады. Сол мезетте-ақ жауапты мамандарға хабар беріліп, жылжымалы құрамнан ақаулы вагон ажыратылып, жөндеу пунктіне жіберілген. Егер вагон қараушы өз ісіне ұқыптылықпен қарап, осындай қырағылық үлгісін көрсетпесе, жол-жөнекей тосын жағдай орын алып, орны толмас зардап-шығынға соқтырар ма еді, кім білсін?!.  

Иә, қырағылық та кәсібилік белгісі. Ал ВЧД-30 басшылығы мамандар біліктілігіне жіті көңіл бөледі. Жұмысшылардың басын жиі қосып, техникалық сабақ өткізу тұрақты түрде жолға қойылған. Айталық, өткен айда ғана «Үздік вагон қараушы» тақырыбымен техникалық байқау-сайыс өтіп, оның қорытындысы бойынша Түркістан ТҚКП-нің вагон қараушысы Асқар Ғалымжан үздік маман ретінде танылды. Арыс вагон пайдалану депосының бас инженері Ғалымжан Байзақов мұндай шара аясында жұмысшылардың кәсіби біліктілігі мен білімін көтеру көзделетінін айтады.  

Вагон қараушылардың білім-білігі мен тәжірибесіне жіті көңіл бөлудің нәтижесінде бүгінде кәсіпорынға қарасты аумақтарда қандай да бір олқылықтарға жол берілмей келеді. Керісінше, қызмет көрсету аймағында стратегиялық маңызы жоғары Сарыағаш мемлекетаралық тапсыру станциясында жұмыс ырғағы бәсеңдемеген. Айталық, соңғы 6 ай ішінде аталған станциядан 4 288 пойыз өткізілген болса, соның ішінде 4 030 пойыз ақаусыз қабылданған және ағымдағы ағыту-жөндеу пункттерінен депо бойынша 2 841 вагон жөнделіп шығыпты. Кәсіпорынның өндірістік көрсеткіші өткен жылға қарағанда едәуір жоғарылаған.  

Жалпы, 180-ге жуық жұмысшының басын қосып отырған кәсіпорын ұжымы алғашқы жартыжылдықта 25 923 пойызды бақылаудан өткізген. Сондай-ақ УЗОТ құрылғысымен 600 км жол білікті мамандардың қатысуымен тексеріліп, қауіпсіздік кепілдемесі берілген.