Жамбылда экологиялық акция жалғасуда
"Қазақстан теміржолшысы" газетінің Жамбыл облысындағы меншікті тілшісі
«Таза Қазақстан» жалпыұлттық жобасы аясында ҚТЖ ауқымды ағаш отырғызу экологиялық акциясын бастағаны белгілі. Жамбыл жүк тасымалы бөлімшесі игі бастаманы жалғастырып, сенбілік өткізді.
Жамбыл вагон пайдалану депосының Тараз қаласындағы вагондарға техникалық қызмет көрсету пункті аумағында өткізілген экологиялық акцияға Жамбыл бөлімшесіне қарасты барлық мекемелерден 80-нен астам жұмысшы-қызметкер қатысты. Филиал директоры Айдын Сеитбенбетов бастаған сала мамандары тал көшеттерін отырғызып, компаниядан бастау алған экочелленджді көршілес Шымкент бөлімшесіне жолдады.
– Барлық құрылымдық бөлімшелерге тал көшеттері таратылып берілді. Бүгін жалпы 2567 түп тал егілді. Тал-дарақ экологияны жақсартып, топырақты тозудан қорғайды. Жауын-шашын кезеңдерінде сор топырақты жерлерде су тасқыны, қар көшкіні жүру қаупі басымырақ, – дейді бөлімше бастығы.
«Таза Қазақстан» экологиялық акциясы шеңберіндегі тазалық және тал егу жұмыстары алдағы уақытта Жамбыл бөлімшесінің құрылымдарында жалғасатын болады.
