Көмір қоры жеткілікті

Қызылорда өңірі тұрғындарын, коммуналдық ұйымдарды биылғы жылыту маусымында 139,3 мың тонна көмірмен қамтамасыз ету жоспарланған. Қазіргі таңда оның 56,1 мың тоннасы, яғни жоспардың 40 пайыздан астамы отын базаларына жеткізілген.  

Қызылорда ЖТ бөлімшесі директорының логистика жөніндегі орынбасары Мейрамбек Шолтабаевтың айтуынша, аймақ бойынша көмірмен қамту ісі жоспарлы әрі тұрақты жүргізілуде. Мониторингтік топтар күн сайын өңірдің түрлі станцияларына барып, көмірдің түсірілуі мен тасымал барысын бақылауда ұстауда. Оған тек теміржол қызметкерлері ғана емес, жергілікті тұрғын үй-коммуналдық шаруашылық бөлімдерінің өкілдері де қатысуда.    

– Көмір тұйықтарға таратылып, түсіру кесте бойынша жүруде, кезек те, дүрлікпе де байқалмайды. Қоймаларда бүгінде 14 мың тоннадан астам қор бар, тағы 22 вагонмен 1518 тонна көмір келе жатыр. Биылғы көмір «Шұбаркөл Көмір», «Жалын Көмір», «Горнорудная Комп», «Майкүбен Бест», «ВостокУгольПром» және «Кияхты Көмір» мекемелерінің кен орындарынан жеткізілуде, – дейді ол.

Бүгінге дейін Сексеуіл станциясына – 966 тонна, Арал теңізі станциясына – 2070 тонна, Қазалы станциясына – 65 вагон, Жосалыға – 4692 тонна, Шиеліге – 9384 тонна, Жаңақорғанға 8142 тонна көмір жеткізіліп, түсірілген. Қазіргі таңда аталған көмір базаларында осыншама көмір қоры тұтынушыларға кезексіз таратылуда екен.

– Қызылорда қаласы мен Белкөл станциясы облыстың негізгі тарату торабына айналған. Белкөлге биылдың өзінде 202 вагон (13 948 тонна) көмір жеткізілген, оның 9660 тоннасы қоймада тұр. Бұл – облыс халқының қажеттілігін толық өтеуге жететін қор, – дейді Мейрамбек Шолтабаев.

Қызылорда қаласының жылу электр орталығы газ және мазутпен жұмыс істегенімен, өңірдің басқа бөліктерінде көмірдің маңызы әлі де зор.