Теміржолшылар депоны жасыл желекке бөледі
"Қазақстан теміржолшысы" газетінің Жамбыл облысындағы меншікті тілшісі
ТЧЭ-30 Шу локомотив пайдалану депосының аумағында «Таза Қазақстан» жалпыұлттық экологиялық акция шеңберінде кең ауқымды күзгі тазалық жұмыстары ұйымдастырылып, 600 түп тал отырғызылды.
Акцияға депоның 100-ге жуық қызметкері қатысты. Теміржолшылар депо аумағын түгел тазартып, қоқыстарды шығарды. Тал отырғызатын орындарды дайындады.
– Алдымен Шу локомотив пайдалану депосының бастығы Медет Әбікеннің тапсырмасы бойынша тал отырғызатын аумақты таңдадық. Депо аумағы кең, машинистерге арналған мемориалды тақтаның алдына шырша отырғызып, гүл еккенбіз. Жалпы мекеме айналасындағы шағын-шағын аумақтарды жасыл желекке көмкеруді ойладық.
Көрнекті жерлерге 100 түп ақ тал, локомотивтер кіріп-шығатын шойын жолдардың бойына және басқа да аумақтарға 500 түп қаратал отырғыздық. Мақсат – Астанадан, ұлттық компаниядан бастау алған ауқымды тал отырғызу экочелленджіне үн қосу, айналаны абаттандыру, – дейді депо бастығының локомотив пайдалану жөніндегі орынбасары Ербол Кукузов.
Расында депо аумағында тал-дарақ отырғызып, гүл егетін алаңдар көп. Ол жерде біраз жыл бұрын еккен көпжылдық шыршалар биіктей түскен. Тұтасып өсетін ақтал тұқымдас ағаштар өзгеше сән бере түсетіні сөзсіз. Депо алдындағы қоғам қайраткері Тұрар Рысқұловтың ескерткіш-бюсті және теміржолшыларға арналған мемориалды тақтаның алды, ашық алаңдар жыл санап жасыл желекке көмкеріле түседі деген сенім мол.
