Маманнан маңызды дәріс
Маңғыстау облысы бойынша меншікті тілші
Маңғыстау электрмен жабдықтау дистанциясының өндірістік оқыту шебері Ақмарал Болысова бір күнін болашақ теміржолшыларға арнады. М.Тынышбаев атындағы Ақтау ALT көлік колледжінің студенттеріне «Электр энергиясын пайдалану ережелері» тақырыбында дәріс өткізді.
Дәріс барысында электр энергиясын дұрыс және қауіпсіз пайдалану қағидалары, тұрмыста және өндірісте кездесетін электр қауіп-қатерлері, жазатайым оқиғалардың алдын алу жолдары туралы жан-жақты түсіндірді. Сонымен қатар электр құрылғыларын пайдалану кезіндегі негізгі талаптар жөнінде айтып, қауіпсіздік техникасын сақтау, электр тогының адам өмірі мен денсаулығына әсері туралы нақты мысалдармен жеткізді.
Өндірістік оқыту шебері студенттерге электр энергиясын үнемді пайдалану, ақаулы құрал-жабдықтарды дер кезінде анықтау және төтенше жағдай туындаған кезде алғашқы көмек көрсету тәртібі жөнінде де маңызды мәліметтер берді. Дәріс интерактивті форматта өтті. Болашағын темір жолдың электрмен жабдықтау саласымен байланыстырғысы келетін студенттер өздерін қызықтырған біраз сұраққа тұшымды жауап алды.
– Іс-шараның басты мақсаты – болашақ мамандардың электр қауіпсіздігі бойынша білімін арттыру, кәсіби жауапкершілігін қалыптастыру және еңбек барысында қауіпсіздік ережелерін қатаң сақтауға үйрету. Сондықтан нақты осы салада еңбек етіп, өндірісте жүрген жұмысшыларды оқытып, білімін жетілдіріп жүрген маманды шақырып, студенттермен кездестіруді жөн көрдік, – дейді колледж басшылығы.