Біздің ұжымдық блогер

«ҚТЖ-Жүк тасымалы» ЖШС Ақтөбе филиалының тауар кассирі Айнұр Жұмашева небәрі 26 жаста, дегенмен теміржол саласында жеті жылдан бері табанды еңбектеніп келеді. Ол миллиондаған қаржының есебін жүргізетін тауар кассирі ғана емес, сегіз қырлы, бір сырлы өнерлі теміржолшы.

Айнұрдың теміржолға келуі кездейсоқ емес. Анасы теміржолшы. Алғашында оператор болып қабылданып, тәжірибе жинақтады. Соңғы төрт жылдан бері тауар кассирі ретінде миллиондаған қаржының есебін жүргізіп, құжаттардың дұрыстығын қадағалап келеді. Жауапкершілік пен дәлдікті талап ететін бұл қызметте ол өзін тәртіпті, ұқыпты әрі сенімді маман ретінде көрсетіп жүр.  

Айнұр еңбек ете жүріп, қоғамдық және мәдени өмірден де шет қалған емес. «ҚТЖ-Жүк тасымалы» ЖШС ұйымдастыратын форумдар мен корпоративтік байқауларға тұрақты қатысады. 2020 жылы компанияның ұжымдық блогері атанды. Жастар форумдарында белсенділігімен көзге түсіп, байқауларда жүлделі орындарға ие болды.  

Бала күнінен сахнаға жақын болып өскен қыз бүгінде Ақтөбе қаласындағы мәдени іс-шаралардың жүргізушісі ретінде танылып жүр. Теміржолшылар мерекесінде Астана Опера сахнасында ән шырқады. Халықаралық мәдени шараларға да қатысып, Түркі мемлекеттері ұйымы аясындағы жобаларда, Қазақстан, Қырғызстан, Өзбекстан, Тәжікстан елдерінде өткен байқауларда өнер көрсетті.  

Сонымен қатар Айнұр – әлеуметтік желілерде теміржол саласының ерекшелігі мен маңызын кеңінен насихаттап жүрген салалық блогер. Пандемия кезінде де пойыз қозғалысын тоқтатпаған теміржолшылар ерлігін, темір жолдың стратегиялық маңызын жиі айтады. Студенттер мен жас мамандарға компаниядағы мүмкіндіктер туралы түсіндіріп, форумдар мен байқауларға қатысуға шақырады.  

«Белсенді болу керек. Идея ұсыну керек. Компания жастарды әрдайым қолдайды», – дейді ол. Жас маман – заманауи теміржолшының жарқын бейнесі.