Атырау станциясында қауіпті жүктердің тасымалы ерекше бақылауға алынды
Атырау облысы бойынша меншікті тілші
Мұнайлы аймақта жүк тасымалдау барысында қауіпті жүктер, яғни мұнай-газ өнімдері, пропан, бутан, мұнай, реактивті және дизель отындары, т.б. жүктер жиі кездеседі. Сондықтан оларды тасымалдау кезінде қауіпсіздікті сақтау аса маңызды.
Осыған орай аймақта ақпаннаурыз айларының ортасында «Қауіпті жүктерді тасымалдау кезіндегі қауіпсіздікті сақтау» атты айлық өтті. Атырау станциясының бастығы Бекжан Жиембетовтың айтуынша, айлық бойынша арнайы комиссия құрылып, тауар кассалары, жүк қабылдап-жөнелтушілер, пойыз қабылдаушылардың бөлмелерінде, техникалық кеңселерде, басқа да қоғамдық орындарда хабарламалар ілінген. Қауіпті жүк жөнелтушілердің вагондары ерекше бақылауға алынып, көліктік және вагон қызметін көрсетуші жүк жөнелтушілер мен жүк қабылдаушы мекеме өкілдерімен арнайы техникалық сабақтар, комиссиялық тексерулер өткен. Логистикалық компаниялармен оларды тасымалдау кезінде қауіпсіздікті сақтаудың маңыздылығы тиянақталған. Сондай-ақ мұнай құю барысындағы технологиялық процестердің және вагон паркінің сақталуы, цистерналардың бүтіндігі мен дұрыстығы қадағаланған.
– Тексеру барысында станция қызметкерлері тарапынан «Каспиан Дриллинг LLP», «ҚТЖ ГП ЦТР», т.б. кірме жолдардан жүк қабылдаушыларға, басқа станцияларға жөнелтілген жүктер қаралып, оларда апатты жүк екенін айғақтайтын арнайы белгілердің болуы, ал вагон пломбалары бүтін, люктер берік жабылғандығы тексерілді. Яғни, қауіпсіздікті бұзу белгілері жоқ екеніне көз жеткізілді. Рас, дизель отыны шамадан асып тиелген вагондар да кездесті, бірақ олар дер кезінде кемшілікті түзетіп, артық майды кері құйып алып, вагондар талапқа сай жабылып, пломбаланды, –дейді станция бастығы.
Жалпы, 13 ақпан-13 наурыз аралығында өткен «Қауіпті жүктерді тасымалдау кезіндегі қауіпсіздікті сақтау» айлығы кезінде Атырау станциясынан қауіпті жүк саналатын 90 вагон түсіріліп, 44 вагон тиелген.