Мамандар желі бойындағы құрылғыларды тексеруде

Ақтөбе магистральдық желі бөлімшесі жолдағы тексерісті күшейтті. Көктемгі байқау барысында әсіресе белгі беру және байланыс жүйелерінің сенімділігі тексеріліп жатыр.

Ақтөбе магистральдық желі бөлімшесіне қарасты Орал, Ақтөбе, Қандыағаш және Шалқар тораптарында 6 мыңнан астам қызметкер еңбек етеді. Олардың басым бөлігі жол шаруашылығы мен белгі беру-байланыс саласында жұмыс істейді.  

Бөлімшенің белгі беру және байланыс бөлімінің басшысы Жәнібек Жұмаевпен желі бойын аралатып жүріп, әр бұрмадағы жауапкершілік пен әр бағдаршам, әр сигналдағы қауіпсіздікті, тәуекелдерді көзбен көрдік. Көктемгі байқау аясында мамандар желі бойын аралап, құрылғылардың жұмысын тексеруде. Жәнібек Жұмаев белгі беру, радиобайланыс және электрмен жабдықтау жүйелерінің тұрақты әрі қауіпсіз жұмысы жайлы түсіндіріп, әр бұрма мен бағдаршамның уақытылы әрі дәл жұмыс істеуі пойыз қозғалысы үшін маңызды екенін жеткізуге тырысты.  

– Станция кезекшісі берген бағытқа сәйкес бұрмалар автоматты түрде ауысып, бағдаршамдар ашылады. Бұл салада жеңіл жұмыс жоқ. Әрбір ток көзі бар құрылғы қауіпті. Тіпті жіңішке жіптей бір сымның ауысып кетуі бүкіл жүйенің жұмысына әсер етуі мүмкін. Сондықтан әр бөлшекке мұқият қарау – міндет. Біз үшін адамдардың қауіпсіздігі қымбат. Әр жұмысшының үйіне аман оралуы үшін күн сайын қауіпсіздік ережелерін еске салып отырамыз, – деді бөлім басшысы.  

Айтуынша, автоматтандырылған жүйелер жол жағдайын кезекші пультіне секундтар ішінде жеткізіп, жедел шешім қабылдауға мүмкіндік береді. Сонымен қатар кіріс бағдаршамдарының алдында пойыз доңғалағының қызуын өлшейтін арнайы құрылғылар орнатылған. Мұндай жүйелер әр 35-40 шақырым сайын орналасқан. Егер пойыз доңғалағында ақау анықталса, ол дереу тоқтатылып, станцияға кіргізілмей, қауіпсіздік шаралары қабылданады. Бұл станция ішіндегі күрделі қондырғыларды қорғау үшін қажет.  

Ақтөбе магистральдық желі бөлімшесінің қарамағында Қандыағаш, Шалқар, Ақтөбе, Орал – төрт белгі беру және байланыс дистанциясы және Ақтөбе, Шалқарда екі электрмен жабдықтау дистанциясы жұмыс істейді. Бөлімше осы құрылымдардағы жұмысты үйлестіріп, теміржол қозғалысының қауіпсіздігін қамтамасыз етіп отыр. Қазіргі таңда бүкіл бөлімше аумағында көктемгі байқау жұмыстары жалғасып жатыр.