Түркістан мен Сексеуіл арасындағы теміржол нысандары тексерілді
Қызылорда облысы бойынша меншікті тілші
Аймақтағы теміржол нысандарын көктемгі комиссиялық тексеруден өткізген комиссиялық топ мүшелері пойыздардың қозғалыс қауіпсіздігін арттыру, жеке құрамның техникалық қауіпсіздігі шараларына басымдық берді.
Құрамында бөлімше басшылары мен бас инженерлер, жауапты мамандар, ревизорлар, кадр және кәсіподақ қызметкерлері бар, басшы-қосшылардың бір уақытта өткізетін комиссиялық тексеру процесі – шын мәнінде қызықты әрі өте жауапты шара. Қызылорда теміржолында биылғы комиссиялық байқау солтүстіктегі нысандардан басталып, оңтүстіктегі Шорнақ – Шиелі – Қызылорда телімінде жалғасты. Шиелі станциясында тораптық жиын ретінде өткізіліп, анықталған кемшіліктер мен олқылықтарға сараптама жасалды. Негізгі ұстаным – бір кемшіліктің қайталануын болдырмау, алдын алу. Сәуір айы басталғалы бері көктемгі комиссиялық тексеруге дайындық жасап жатқан жол бойындағы станциялар мен құрылымдардың жазғы маусымға дайындығын бағалаған бөлімше бастығы Ербол Сәулебеков, биылғы жылғы көктемгі комиссиялық тексерудің жалпы деңгейі «жақсы» екенін білдірді. Дегенмен Түркістан мен Сексеуіл арасында әлі талай жұмыс бар деді.
– Кешеден бері Түркістан – Шиелі станциясының аралығы, бүгін Шиелі станциясындағы нысандар тексеруден өткізілді. Бүгін Шиелі – Қызылорда аралығын сүзіп шығамыз. Тек тексеру нәтижесіне қарап толық баға беруге болады, ؘ– деді Ербол Сәулебеков.
Аймақтағы әрбір бекетке аялдап, ондағы нысандарды иненің көзінен өткізгендей мұқият тексерген комиссиялық топ кем-кетікті жіпке тізіп құжаттап, оларды дер кезінде жою жолдарын да қарастыруда. Мәселен Сексеуіл-Қоскөл телімінде, Сексеуіл-Қазалы-Қызылорда учаскелерінде анықталған кемшіліктер туралы Қызылорда аймақтық қозғалыс қауіпсіздігі ревизорлары аппаратының бастығы Алмат Молдашев айтып берді.
– Кеше Шиелі – Бірқазан учаскесінде 5 ескерту жасалды, ревизор Олжас Сиятов тарапынан 1 талон алынып, тыйым салынған маршрут бойынша 10 ескерту жасалды. Ревизор Әмір Жүсіпбеков тарапынан бағыттамалық бұрмада жылдамдықты шектеу жайлы ескерту жасалды. Сексеуіл – Қоскөл учаскесінде 2 вагон пайдаланудан уақытша ажыратылды, 2 КМО тоқталды, 1 құрылғы, 7 бағыттамалы бұрма жабылды, 3 рет жолдың жылдамдығы шектелді, жалпы 17 ескерту шарасы жасалды. Ревизор Б.Маханбетов 7 ескерту жасаса, Сәкен Бимұрзаев тарапынан 10 ескерту шарасы рәсімделіп, оларды дер кезінде қалпына келтіру жұмыстары дереу қолға алынды, – дейді ревизор Алмат Молдашев.
Қазіргі таңда аймақ тұрғындарының теміржолды кез келген жерден кесіп өтуі тыйылмай тұр. Тіпті комиссия мүшелері осындай көріністердің орын алып жатқанына куә болып, ескерту жасаса да тұрғындар өздері жасап алған сүрлеумен тартып бара жатқаны қынжылтпай қоймады. Сондықтан жол бойына ескерту белгілерін алыстан көрінетіндей етіп бадырайтып жазып қою, оны тұрғындардың көзіне бірден шалынатын көрнекі жерге іліп қою, ескіргендерін жаңарту, жергілікті әкімдіктермен бірлесе жұмыс жасап, тұрғындарға теміржолдың қауіпті аймақ екенін түсіндіру шараларын күшейту керектігі қатаң тапсырылды.
Тексеру барысында комиссиялық топ тарапынан теміржол бойын жасыл желекке айналдырып қоршаған ортаға қамқорлықты арттыру мақсатында көшет отырғызу жұмыстары да жасалды. Бұған дейін Сексеуіл – Қоскөл телімінде, Сексеуіл – Қазалы – Қызылорда учаскесінде көшет еккен комиссиялық топ мүшелері Бәйгеқұм және Сұлутөбе станцияларында да жеміс, сәндік ағаш көшеттерін отырғызды.