Маңғыстауда тыл ардагері Нұрғали Төлеповке ескерткіш тақта ашылды

Ұлы Отан соғысының тыл ардагері, түбектік теміржолшы Төлепов Нұрғали Санақайұлының құрметіне өзі еңбек еткен Маңғыстау локомотив депосы ғимаратына ескерткіш тақта орнатылды. Мемориалдық белгінің ашылу салтанаты Отан қорғаушылар күні мен Жеңіс мерекесіне тұспа тұс ұйымдастырылды.  

Қиын-қыстау сәтте бұғанасы қатпай жатып еңбекке араласқан ер есімін ұлықтап, үлгі ету мақсатында орнатылған ескерткіш тақтаның ашылу рәсіміне тыл ардагерінің ұрпақтары, теміржол басшылары, сала қызметкерлері, аймақтық ардагерлер кеңесі мен мұнайлы аудандық ардагерлер ұйымының төрағалары, жергілікті билік өкілдері қатысты. Аймақтық ардагерлер кеңесінің төрағасы Үсен Имашов, ардагермен бірге еңбек еткен зейнеттегі теміржолшылар, ұрпақтары сөз алып, естеліктер айтты.  

Нұрғали Төлепов 1927 жылы Маңғыстаудың Жетібай ауылында дүниеге келген. 1930 жылдардың ашаршылық кезінде отбасы түркімен жеріне қоныс аударған. Әлі буыны бекімен Нұрғали жас болса да 1941 жылы 14 жасында Казанджик локомотив депосына паровозға от жағушы болып жұмысқа алынған. 1941-1945 жылдары ҰОС кезінде Бронь арқылы сол депода жұмысын жалғастырған.  

Мақат-Ақтау аралығында теміржол салынып, пайдалануға берілгеннен кейін 1966 жылы Маңғыстау станциясында локомотив депосы ашылып, жан-жақтан мамандар жинақтала бастайды. Сол кезі ол да шақыртумен тепловоз машинисі жұмысына келеді. Үш ұл, төрт қызын тарихи Отанына оралтып, Маңғыстаудағы болашақ теміржолшылар әулетінің негізін қалайды.  

1967-1978 жыл аралығында депода жолаушылар тасымалында, маневрлік қозғалысында тепловоз машинисті болып еңбек еткен. Өмірінің соңғы сәтіне дейін осы кәсібіне адал болып, 1978 жылы 51 жасында өмірден өкен. Қазір ата жолын ұрпақтары жалғап жүр. Ұлдары Наурыз бен Өтепберген Тулеповтар түбек теміржолынан зейнетке шыққан. Бүгінде бұл салада немерелерінің аты аталады. Бахтияр Төлепов Маңғыстау жол бөлімшесінде локомотив шаруашылығы бойынша бас инспектор сараптамашысы, жұбайы Майра Маңғыстау темір жол вокзалында хабарламашы.  

Немере қызы Ақмарал Маңғыстау локомотив депосында маршрутты өңдеу операторы, Марат және Ербол Тулепов осы депода тепловоз машинисті. Мадияр мен Азамат Тулепов машинист көмекшісі, жиендерінен Дәурен Құбайдұлла тепловоз машинисті.

- Елге оралғаннан кейін Маңғыстау локомотив депосында қызмет етіп, өзінің артында депоның болашағы үшін осыншама ұрпақты тәрбиелеп берген ардагеріміздің есімін ұлықтап, естелік тақтайша орнату біз үшін де мәртебе. Нұрғали Төлепов жалпы локомотив шаруашылығына бала кезінде келіп, соғыс жылдарында тылды бекемдеу үшін қызмет еткен. Осындай еңбектері үшін Кеңес Одағының Жоғарғы кеңесі төрағасы атынан «Ерлік еңбегі үшін» марапаталған. Қазақстан Коммунистік партиясы Орталық Комитетінің, Қазақ ССр Жоғарғы Советі Президиумының және Министрлер Советінің қаулысы бойынша «Бесжылдықтың тапсырмаларын орындаудағы» аса көрнекті табыстары үшін  Қазақ Советтік Социалистік Республикасының «Алтын Құрмет» кітабына аты жазылған теміржолшы. Оның ұрпақтары да ата атына кір келтірмей, абыроймен өз міндеттерін атқарып жүр, - дейді Маңғыстау локомотив депосының кәсіподақ ұйымы төрағасы Әбілсейт Набиханов.